[29-12-2018] O Concello de Ames, a través da Concellaría de Educación e Cultura, vén de recibir o informe definitivo sobre o "Perfil socioeconómico e laboral das familias usuarias dos comedores escolares municipais de Ames" elaborado pola Universidade de Santiago de Compostela a raíz do progresivo incremento das solicitudes na Rede Municipal de Comedores Escolares, especialmente acentuado neste curso 2018/2019, onde se rexistraron 1.018 renovacións para un total de 1.254 prazas dispoñibles. Neste curso accederon ao servizo por primeira vez máis de 200 novos usuarios/as. Dende o ano 2015 o Concello de Ames incrementou máis de 250 prazas de comedores escolares municipais.

[28-12-2018] O Concello de Ames participa, un ano máis, na campaña de esquí que organiza a Deputación da Coruña entre o 25 de xaneiro e o 25 de febreiro. Dirixida a rapazas e rapaces de 11 a 15 anos, ambos incluídos, a campaña inclúe a realización de cursos de esquí. As mozas e mozos amesáns participarán deste programa entre 25 e o 28 de xaneiro. As inscricións deberán ser presentadas no Rexistro Xeral, en horario de 9:00h a 14:00 horas, ata o vindeiro 10 de xaneiro. O custo desta actividade, que conta con 12 prazas dispoñibles, é de 85 euros. Premendo na ligazón que está a túa dereita, baixo o apartado de descargas, poderás obter un folleto informativo da campaña no que está incluído o impreso de inscrición.

[28-12-2018] Este xoves, 27 de decembro, celebrouse o pleno ordinario correspondente ao mes de decembro no que a Corporación municipal aprobou, por unanimidade, a posta a disposición da Xunta de Galicia do terreo necesario para ampliar o CEIP Agro do Muíño con 6 novas aulas, para grupos de educación primaria, coas que este colexio pasará a ter unha liña máis. Tamén se aprobaron o regulamento da Escola municipal de música de Ames; a modificación da ordenanza fiscal reguladora da taxa pola actividade administrativa do cemiterio municipal; a primeira modificación da ordenanza reguladora do prezo público polos servizos funerarios do cemiterio municipal; e unha proposta do PSdeG sobre a política do Goberno galego en relación do financiamento das Entidades locais.

[27-12-2018] Este luns, 24 de decembro, comezou unha nova edición do programa Nadal Lúdico, co que o Concello de Ames procura axudar ás familias a compatibilizar a vida laboral e familiar ofrecendo actividades matinais ás crianzas do segundo ciclo de infantil e de educación primaria, que nesta edición están destinadas a reforzar as habilidades de pensamento e linguaxe dos cativos e cativas como cidadáns. O programa, no que están inscritos 138 nenos e nenas, conta con servizo de Bos días e comedor.