[03-01-2019] A Xunta de Goberno Local vén de aprobar a adxudicación do proxecto que recolle as obras de mellora dos camiños de Santo a Mourigade e de Maguxe a Lapido, nas parroquias de Ortoño e Bugallido. Este proxecto, adxudicado á empresa Martínez Montes e Hijos, S.L. por un importe de 91.476 euros IVE incluído, está incluído no Plan provincial de cooperación ás obras e servizos de competencia municipal “POS+2018” da Deputación da Coruña.

[03-01-2019] Durante o mes de xaneiro a Aula CeMIT de Ames, que está situada na Casa da Cultura de Bertamiráns, organiza un ciclo de empregabilidade e outro de ofimática dirixido a adultos. Tamén se realizarán diversos cursos enfocados a internet, o smathphone ou mecanografía. Para os e as máis pequenas, realizaranse cursos de informática e mecanografía, así como un ciclo de Libreoffice dirixido a estudantes. Para obter máis información ou para reservar praza en calquera destas actividades, as persoas interesadas pódeno facer a través da páxina web do CeMIT (https://cemit.xunta.gal/gl/centro/9), achegándose á propia aula, chamando ao número de teléfono 662 371 511 ou enviando un correo electrónico ao enderezo cemit.ames@xunta.gal

[02-01-2019] O sábado, 5 de xaneiro, as nenas e nenos amesáns celebrarán a chegada dos Reis Magos cunha festa especial, que terá lugar nos pavillóns municipais do Milladoiro e de Bertamiráns. Antes, os Reis Magos pasarán polas Oficinas municipais do Milladoiro e pola Casa do Concello de Bertamiráns, co obxectivo de deixar a súa firma no libro municipal de sinaturas. Desde alí, partirán en cabalgata ata os pavillóns, onde se celebrará unha función de pompas de xabón e dous espectáculos de maxia. No recibimento aos Reis nos pavillóns tamén haberá chocolate con rosca.

[02-01-2019] O Concello de Ames organiza, por segundo ano consecutivo, o seu Torneo de Nadal de Fútbol, que se celebra este mércores e xoves, 2 e 3 de xaneiro, nos campos municipais de fútbol do Milladoiro e Bertamiráns. O torneo contará coa participación dun total de 44 equipos, repartidos nas categorías prebenxamín e alevín, que participarán hoxe martes, e benxamín e infantil, que disputarán o torneo mañá xoves. O primeiro e o segundo equipo clasificado en cada categoría recibirá un trofeo colectivo. Asemade, todas as nenas e nenos participantes recibirán un obsequio por parte do Concello de Ames. Poden consultar a programación de cada categoría nas ligazóns que están á dereita nesta nova, baixo o apartado de descargas.