[08-01-2019] Os 138 nenos e nenas que participaron nesta edición do Nadal Lúdico volven ao colexio despois de dúas semanas de actividades e diversión. O programa de conciliación rematou onte con música e baile, unha opción elixida polos cativos e cativas, que nesta edición realizaron diversas accións dirixidas a reforzar as súas habilidades de pensamento e linguaxe e a súa capacidade de decisión. O obxectivo deste Nadal Lúdico foi dotar aos pequenos e pequenas de ferramentas para analizar o seu entorno como cidadáns críticos.

[07-01-2019] O goberno municipal presentou esta mañá na Praza do Concello de Bertamiráns os dous primeiros automóbiles ecolóxicos que entran a formar parte do conxunto de vehículos municipais, unha furgoneta eléctrica e outra híbrida de gas e gasolina. Á presentación asistiron José Miñones, alcalde de Ames, Blas García, concelleiro de Urbanismo, Obras Públicas e Servizos Básicos, e Javier García, concelleiro de Medio Ambiente e Desenvolvemento Sostible. Con esta iniciativa, o goberno busca seguir traballando a favor dun modelo sostible, obxectivo que a finais de 2018 posibilitou a instalación de dous puntos de recarga para coches eléctricos.

[05-01-2019] Gaspar, Melchor e Baltasar pasaron hoxe por Ames para saudar as nenas e nenos do concello. Ás 17:00h e ás 18:00 horas, respectivamente, os Reis achegáronse ás Oficinas municipais do Milladoiro e á Casa do Concello de Bertamiráns para deixar a súa firma no libro municipal de sinaturas. Posteriormente, recorreron as rúas das dúas localidades nun vehículo antigo, acompañados dos seus paxes e heraldos. A súa chegada aos pavillóns municipais estivo marcada polo entusiasmo das máis cativas e cativos, os cales puideron desfrutar de espectáculos de maxia e de pompas. Nos 90 minutos que durou o recibimento real repartíronse caramelos sen glute, así como chocolate con rosca para merendar. Os Reis Magos tamén entregaron os premios do concurso de Cartas de Nadal.

[04-01-2019] Os campos municipais de Bertamiráns e do Milladoiro acolleron o mércores e o xoves desta primeira semana de xaneiro a celebración do II Torneo de Nadal de Fútbol Concello de Ames. Os gañadores do campionato resultaron o equipo B do Bertamiráns FC na categoría infantil, o equipo A do BFC en alevín, a ED Xuventude Oroso en prebenxamín e o equipo D do BFC na categoría benxamín. A entrega de trofeos recaeu nas concelleiras amesás de Sanidade, Servizos Sociais e Igualdade, Luísa Feijóo, e de Participación, Atención Veciñal e Promoción Económica, Isabel González.