A Escola Municipal de Música de Ames organiza durante este mes catro obradoiros musicais diferentes dirixidos a maiores de oito anos. Pensados para grupos de ata vinte persoas, inclúen propostas de batucada, música tradicional, teatro musical e home studio. Teñen un custe de 10 euros, e desenvolveranse nas instalacións da EMMA todos os sábados do mes, en horario de 11:00 a 13:00 horas. Aquelas persoas interesadas en inscribirse poden facelo enviando a ficha de inscrición cuberta ao enderezo electrónico escolademusica@concellodeames.gal.

"AMES AV LAB"  a piques de rematar a fase de captación de proxectos está realizando dúas reunións informativas en centros educativos esta semana: o martes na Facultade de Comunicación da Universidade de Santiago de Compostela e mércores no Centro de Formación Profesional CIFP Imaxe e Son en A Coruña. En ambos os centros, realizaranse presentacións a estudantes de último ano de formación e de master, co propósito de brindarlles a oportunidade de materializar a súa idea de proxecto ou o proxecto que teñan en marcha. Premendo nesta ligazón podes descargar as bases do AMES AV LAB.

Esta mañá, o salón de plenos da Casa do Concello, en Bertamiráns, recibiu a visita do alumnado de cuarto curso de educación primaria do CEIP Agro do Muíño, que se achegou á Casa consistorial para coñecer de primeira man o traballo que se realiza neste lugar. Así, acompañados de varios membros do Goberno local e dos grupos municipais do Partido Popular e do BNG, arredor de 75 nenos e nenas aprenderon que é un pleno municipal, o traballo que realizan os edís municipais e as funcións que cumpre a Administración local. Ademais, a rapazada puido trasladar aos membros da Corporación as súas dúbidas e preguntas.

Este sábado, 13 de abril, a praza da Maía de Bertamiráns acollerá a terceira edición da Feira de Saúde e Ben-Estar, organizada polo Concello de Ames a través da concellería de Promoción da Saúde. A partir das 11:00 horas e ata as 20:00 horas, un total de 10 asociacións participarán neste evento cos seus stands para proporcionar información sobre a súa labor a todas aquelas persoas que se acheguen ata a feira. Ademais, a xunta local da Asociación Española Contra o Cancro de Ames participará na Feira da Saúde con dúas exposicións e unha charla sobre o cancro de mama. A temática central desta edición será a menopausia e os seus efectos na vida das mulleres.