O Concello de Ames, a través da súa empresa pública municipal de auga, Augas de Ames EPEL, pon en marcha un verán máis a campaña “Cada gota conta”, unha iniciativa de sensibilización que ten como obxectivo fomentar un uso responsable e consciente da auga durante os meses estivais.

Nos últimos días, Augas de Ames EPEL, encargada da xestión do servizo de abastecemento no municipio, detectou un aumento notable do consumo de auga, especialmente derivado de usos non esenciais como o rego de xardíns e zonas verdes, o enchido de piscinas ou outras actividades similares.

Ante este contexto e as previsións de continuidade das altas temperaturas nas próximas semanas, desde o Concello de Ames e Augas de Ames faise un chamamento á colaboración da veciñanza para extremar a responsabilidade no uso deste recurso esencial, co fin de garantir o abastecemento para toda a poboación e evitar a necesidade de adoptar medidas restritivas.

No marco da campaña “Cada gota conta”, recoméndase á cidadanía:
-Evitar consumos innecesarios e revisar posibles fugas nas instalacións domésticas.
-Optimizar o rego de xardíns e zonas verdes, realizándoo nas horas de menor evaporación e reducindo a cantidade de auga empregada.
-Facer un uso responsable no enchido e mantemento de piscinas.
-Evitar o uso de auga potable para a limpeza de exteriores, vehículos ou superficies non imprescindibles.
-Adoptar hábitos de aforro de auga no día a día.

O alcalde de Ames e presidente de Augas de Ames EPEL, Blas García, lembra que “o uso responsable da auga é unha obriga compartida. Cada verán incrementa a demanda deste recurso esencial, polo que facemos un chamamento á veciñanza para que adopte pequenos hábitos de aforro que, sumados, teñen un grande impacto”. Por outra banda alerta de que se está a notar “un descenso importante do nivel da auga na captación no río Tambre, o que representa unha preocupación para o Goberno, xa que neste mes de xuño estamos en niveis de agosto de anos anteriores”.

Pola súa banda, a xerente de Augas de Ames, Genma Otero, sinala que “coa campaña Cada gota conta queremos concienciar e previr, para garantir o abastecemento para todos e todas sen necesidade de adoptar medidas restritivas”.

Desde o Concello de Ames agradécese a colaboración da veciñanza e lémbrase que pequenos xestos individuais teñen un impacto colectivo decisivo, especialmente nun contexto de maior presión sobre os recursos hídricos e de incremento das temperaturas durante a época estival.

Novas relacionadas

El Correo Gallego: "La captación de agua preocupa en Padrón y Ames: "Está a nivel de agosto""

La Voz de Galicia: "Ames alerta del bajo nivel del Tambre en el punto de captación y pide reducir el gasto de agua"