O Club Xuvenil de Ames, Distrito 13 17, regresa o próximo venres 10 de abril cunha nova actividade: FUROR. Dende as 19.00 e ata as 21.00 horas, os rapaces e rapazas participarán nun xogo baseado no programa televisivo que recibe o mesmo nome. A actividade celebrarase no Pazo da Peregrina, en Bertamiráns.  

Esta actividade consistirá en, mediante a realización de equipos, caracterizarse e preparar grandes postas en escena co gallo de organizar unha gran velada repleta de probas musicais, nun ambiente distendido e festivo de rapaces e rapazas de entre 13 e 17 anos con gañas de pasalo ben. Esta actividade busca dinamizar e promover a participación da mocidade a través da música e a interpretación. 

Todas aquelas persoas interesadas en participar nesta actividade poden inscribirse mediante este formulario dixital ou a través do código QR da cartelaría antes do xoves previo á actividade. Cabe destacar que cada actividade é independente das demais, polo que anotarse nunha non é vinculante co resto. Para calquera dúbida, as persoas interesadas poden contactar en info@anacoseducativos.com ou no 694 216 484.  

Máis actividades no mes de abril 
Logo deste xogo de interpretación, máis adiante, o sábado 25 de abril, a organización volverá xuntarse de 19.00 a 21.00 horas, esta vez no anexo do pavillón municipal do Milladoiro, para realizar un Escape Room. 

Distrito 13 17
Distrito 13 17 é un espazo activo, unha alternativa para que a xuventude do concello entre os 13 e os 17 anos (2013-2008) se coñeza e estableza nexos de unión e relacións sas, e onde a mocidade sexa a verdadeira protagonista do seu lecer. Cada encontro será unha oportunidade para expresarse, compartir, aprender e construír grupo, sempre nun ambiente seguro, respectuoso e participativo.