O Club Xuvenil de Ames, Distrito 13 17, regresa este sábado 21 de marzo cunha nova actividade: Ames Misterioso. Dende as 19.00 e ata as 21.00 horas, os rapaces e rapazas participarán nunha xincana na que terán que conseguir resolver o enigma por medio de diversas probas que irán atopando pola contorna. A actividade comezará no anexo do pavillón municipal do Milladoiro. 

Esta xuntanza, ademais de servir como espazo de socialización e colaboración entre a rapazada amesá, ten como obxectivo promover o coñecemento da nosa contorna por medio das probas, que afondarán na historia e tradición do Concello de Ames, así como proporcionar tempo lúdico de calidade ás persoas participantes. 

Todas aquelas persoas interesadas en participar nesta actividade poden inscribirse mediante este formulario dixital ou a través do código QR da cartelaría antes do xoves previo á actividade. Cabe destacar que cada actividade é independente das demais, polo que anotarse nunha non é vinculante co resto. Para calquera dúbida, as persoas interesadas poden consultar en info@anacoseducativos.com ou no 694 216 484. 

Máis actividades no mes de abril 
O mes de marzo remata, mais en abril o Distrito 13 17 continúa coas súas xuntanzas. O venres 10, de 19.00 a 21.00 horas, no Pazo da Peregrina de Bertamiráns, levarase a cabo a actividade Furor. Máis adiante, o sábado 25, a organización volverá xuntarse de 19.00 a 21.00 horas, esta vez no anexo do pavillón municipal do Milladoiro, para realizar un Escape Room. 

Distrito 13 17
Distrito 13 17 é un espazo activo, unha alternativa para que a xuventude do concello entre os 13 e os 17 anos (2013-2008) se coñeza e estableza nexos de unión e relacións sas, e onde a mocidade sexa a verdadeira protagonista do seu lecer. Cada encontro será unha oportunidade para expresarse, compartir, aprender e construír grupo, sempre nun ambiente seguro, respectuoso e participativo.