A concelleira de Benestar Social, Igualdade e Voluntariado, Uxía García, e o coordinador de Alcer Coruña, Alfredo Saborido, presentaron esta mañá na Casa do Concello as VII Xornadas de Persoas con Enfermidade Renal de Galicia organizadas pola Federación Alcer Galicia, que se celebrarán ao longo da mañá do próximo domingo día 30 de novembro no auditorio da Casa da Cultura  de Bertamiráns. Tamén foi presentado o concerto de góspel, programado para o sábado 29, a prol da doazón de órganos.

O Concello de Ames, a través da Concellería de Benestar Social e Igualdade, organiza un ano máis unha programación específica para conmemorar o Día Internacional da eliminación da violencia contra a muller. A programación comeza coa entrega nos colexios de infantil e primaria de lotes de libros sobre o Día Internacional da Eliminación da Violencia contra a Muller. O martes 25 darase lectura ao manifesto institucional na praza do Concello e contarase coa actuación musical de Belén Tajes. O venres 28 de novembro celebraranse as Xornadas Achégate á Igualdade, que se desenvolverán na Casa da Cultura do Milladoiro. Ademais, o venres 28 o alumnado do instituto de Bertamiráns participará nunha actividade de formación sobre anti-bulling con defensa persoal.

O Banco Municipal de Reciclaxe Electrónica do Milladoiro imparte o sábado, 22 de novembro, organiza un obradoiro para entender e reducir a factura da luz. Neste taller explicaranse os conceptos clave da factura eléctrica: termo de potencia (custe fixo pola potencia contratada) e termo de enerxía (custe variable polo consumo real). Esta actividade impartirase no antigo centro de saúde do Milladoiro, na rúa Agro do Medio, número 8, de 11:30 a 13:00 horas. A inscrición pódese realizar premendo nesta ligazón.

A Asociación de Familias Monomarentais de Galicia (FAGAMOS), en colaboración co Concello de Ames, organizan a actividade “Encontros Monoparentais en Ames”. Esta iniciativa, que se vai desenvolver no Milladoiro e Bertamiráns, está dirixida a familias monoparentais do concello de Ames (nais/pais e os seus fillos e fillas). Ofreceranse dúas charlas: o 14 de novembro na Casa da Cultura do Milladoiro e o 22 de novembro no Pazo da Peregrina, en Bertamiráns. Ademais, establecerase un punto de asesoramento personalizado o 17 de novembro no Milladoiro e o 25 de novembro en Bertamiráns. Para contar cunha previsión de participación hai que inscribirse enviando un correo electrónico a servizos_sociaisberta@concellodeames.gal. O prazo de inscrición para participar na charla do Milladoiro estará aberto ata ás 00.00 horas do xoves 13 e para a charla de Bertamiráns ata as 00.00 horas do venres 21.