Os irmáns de Ames, Olivia e Xoán Parga, volveron competir a pasada fin de semana, sumando deste xeito unha nova experiencia no mundo do karate. Xoán visitou Ciudad Real para disputar a primeira fase da Liga Nacional de Karate sub-21, mentres que a súa irmá Olivia desprazouse ata Valga para defender o título que obtivo na pasada edición do torneo organizado polo Karate Valga.

O club TK Denodo de Bertamiráns está de celebración logo de que tres dos seus deportistas participasen no Campionato de España cadete de taekwondo celebrado en San Vicente del Raspeig (Alicante) os días 28 de febreiro e 1 de marzo. Dmytro Kushniruk, Jorge Nogueiras e Xián Paz foron os representantes da delegación amesá na competición estatal, na cal Galicia conseguiu a primeira posición no medalleiro xeral e feminino, e a segunda posición no masculino.

Este domingo, 8 de marzo, o Concello de Ames acolle o VII Trail e Andaina Ribeiras do Tambre e III Campionato Xunta de Galicia de Trail Running Preclassic. Unha nova edición da proba organizada polo Concello e a Federación Galega de Atletismo, que este ano reunirá a 569 persoas entre as distintas categorías. A carreira comezará ás 10.00 horas dende A Ponte Maceira, e os participantes poderán recoller os seus dorsais a partir das 07.45 horas nas instalacións do Real Aeroclub de Santiago en Piñeiro. Este ano, como novidade, poderanse recoller os dorsais o sábado pola tarde, de 16.00 a 20.00 horas, nas instalacións de BJ Trainers. Consulta todas as bases e regulamento da proba aquí. 

O equipo de competición da escola de FitKid, baile e acrobacia E-motion, con sede en Bertamiráns, asinou unha estrea soñada na súa primeira participación oficial nun campionato interautonómico, celebrado este pasado domingo, 1 de marzo, no pavillón da Marazuela, en Las Rozas (Madrid). Todas as coreografías presentadas pola escola de Ames lograron subir ao podio. Un pleno de podios que supera calquera expectativa inicial e que confirma o gran traballo realizado durante os últimos meses. Ademais, a organización de Fit Kid España fixo entrega dunha placa de recoñecemento ao director da escola, Edu López, por ser E-motion a primeira escola oficial de FitKid en Galicia.