Premendo nas ligazóns que están ao pé deste aviso pódense obter os menús da Rede de Comedores Escolares (almorzos, xantares e merendas). Estes menús foron elaborados pola nutricionista municipal do Concello de Ames.

O Concello de Ames, a través do departamento de Persoal, fai público o anuncio do Tribunal encargado de xulgar as probas para a estabilización de 19 prazas de auxiliar administrativo/a, no que se resolven as alegacións formuladas polas persoas aspirantes á baremación de méritos e se realiza unha proposta de nomeamento. Ademais, fíxase a data de sorteo para establecer o número de orde daqueles aspirantes en cuxos casos non fose posible desfacer os empates trala aplicación dos criterios das bases. Dito sorteo terá lugar o martes, 26 de outubro, ás 10:00 horas, na sala de usos múltiples da Casa do Concello de Ames.

A entidade Llega 700 púxose en contacto co Concello de Ames para informar á veciñanza de que durante as próximas semanas as principais operadoras de telefonía móbil van implantar en Ames os novos servizos de telefonía móbil de nova xeración, 4G e 5G, que se habilitan sobre as bandas de 800 e 700 MHz, respectivamente, o que permitirá gozar de conexións móbiles de alta velocidade cunha mellor cobertura no interior dos edificios e maior extensión xeográfica. Dito proceso pode afectar á recepción do sinal de TDT. Para resolver posibles problemas na recepción da sinal TDT pódese chamar ao teléfono gratuíto 900 833 999.

Ames Radio pon un ano máis os seus micrófonos a disposición da cidadanía para a elaboración de programas de radio. Calquera persoa, asociación ou entidade pode presentarse ata o día 13 de outubro enviando a ficha de solicitude ao correo electrónico radio@concellodeames.gal. Aceptaranse proxectos presentados por entidades, asociacións ou persoas non empadroadas no concello, sempre que as súas propostas resulten de interese para o municipio amesán ou estean protagonizadas por persoas residentes, nadas ou que traballen en Ames. Cada proxecto deberá ser presentado por unha persoa coordinadora que deberá ter un mínimo de 18 anos de idade. Pódense consultar todos os detalles nas bases que regulan a Radio Cidadá, ligadas no pé deste aviso.