O vindeiro sábado, 14 de decembro, realizarase no campo da festa de Biduído o festival SolporSon de Ames, no que dende as 17.00 horas haberá batalla de galos e unha exhibición de grafite. O festival estará presentado pola xornalista, Paula Señarís. Dende as 19.30 horas actuarán os grupos Náiade, Triska, Monoulious Dop, De Vacas, Biribirlocke e Sondarúa. Tres destas bandas musicais: Náiade, Triska e Biribirlocke son grupos locais de Ames. Náiade e Triska, que ensaian na Factoría, debutan actuando nun festival. Trátase dunha nova iniciativa posta en marcha dende a Concellaría de Mocidade e Normalización  Lingüística, que xorde das xuntanzas realizadas cos mozos e mozas dentro da Comisión de orzamentos participativos. Haberá actividades de cultura urbana e moita música.

Este sábado 30 de novembro chega ao Concello de Ames a obra de teatro “Bailamos” de Aquelando Teatro de Muros. Será ás 21.00 horas no auditorio da Casa da Cultura de Bertamiráns. Destinada a un público adulto, as entradas son de balde ata completar aforo.

O día 20 de decembro, ás 17.30 horas, terá lugar unha andaina solidaria a favor do Banco de Alimentos Municipal do Concello de Ames. Haberá unha carpa habilitada na praza de Chavián, na que se repartirá chocolate e rosca para todos os participantes, ademais da realización de diversos sorteos. Todo aquel que se anime poderá asistir disfrazado, cunha temática totalmente libre.

Este xoves, 28 de novembro, realizarase o pleno ordinario do mes de novembro no que a Corporación municipal debaterá sobre a aprobación do expediente de modificación orzamentaria número 4/2019, na modalidade de suplemento de créditos, por un importe de 131.465 euros, para sufragar a mellora de viarios en Biduído de Abaixo e no Milladoiro, así como a mellora do parque infantil da Condomiña. Tamén se vai debater a aprobación do suplemento de crédito 5/2019 por valor de 422.056 euros; prorrogar por cuarta vez e polo prazo dun ano o contrato asinado con Urbaser S.A para a xestión da limpeza viaria e do punto limpo; aprobar dun xeito definitivo o estudo de detalle das parcelas 14, 15, 16 e 17 do Plan Parcial do Polígono industrial do Milladoiro; e unha proposta de Ciudadanos para a creación dunha sección da escola oficial de idiomas en Ames. Estes temas foron previamente tratados este luns, 25 de novembro, nas comisións informativas.