A Concelleira de Cultura, Natividade  González, presentou esta mañá o programa de decembro para as bibliotecas municipais xunto con Divina Fernández e Bibiana Calvo, traballadoras municipais das bibliotecas municipais de Bertamiráns e Milladoiro. Arranca así un mes de decembro repleto de grandes novidades editoriais, que serán presentadas polos seus propios autores en diferentes espazos do concello. A programación arranca o mércores, 4 de decembro, con Paulo Calvo, proseguirá con Ángeles e Isabel Abelleira Bardana o próximo xoves 12 de decembro e Nazaret López o xoves 19 de decembro.

Dende a Concellaría de Cultura informan que queda suspendido o espectáculo de teatro musical “Nube nube sol”, de Teatro ao Cubo, debido aos problemas de saúde dunha das persoas de dita compañía. No lugar deste espectáculo, hoxe pola tarde, Paco Nogueiras estará na Casa da Cultura do Milladoiro, en dúas sesións (unha ás 17.00 horas e outra as 18.00 horas) co seu espectáculo “Brinca Vai!” Aínda quedan estradas dispoñibles e pódense mercar dende ás 16.00 horas na propia Casa da Cultura do Milladoiro. Teñen un prezo de 4 euros a xeral e de 2 euros a reducida.

O vindeiro martes, 3 de decembro, terá lugar a presentación da Xunta Local da Asociación Española Contra o Cancro de Ames, pertencente á Xunta provincial de A Coruña. Será ás 20.00 horas no Pazo da Peregrina de Bertamiráns e durante a mesma terá lugar unha charla do Doutor Santiago Aguín, oncólogo pertencente ao Servizo de Oncoloxía Médica do Hospital Clínico Universitario de Santiago de Compostela.

O vindeiro sábado, 14 de decembro, realizarase no campo da festa de Biduído o festival SolporSon de Ames, no que dende as 17.00 horas haberá batalla de galos e unha exhibición de grafite. O festival estará presentado pola xornalista, Paula Señarís. Dende as 19.30 horas actuarán os grupos Náiade, Triska, Monoulious Dop, De Vacas, Biribirlocke e Sondarúa. Tres destas bandas musicais: Náiade, Triska e Biribirlocke son grupos locais de Ames. Náiade e Triska, que ensaian na Factoría, debutan actuando nun festival. Trátase dunha nova iniciativa posta en marcha dende a Concellaría de Mocidade e Normalización  Lingüística, que xorde das xuntanzas realizadas cos mozos e mozas dentro da Comisión de orzamentos participativos. Haberá actividades de cultura urbana e moita música.