O club XL Milladoiro, en colaboración co Concello de Ames, organiza para este domingo, 8 de decembro, o primeiro torneo de baloncesto 3x3. Esta actividade desenvolverase no pavillón do Milladoiro, en horario de 15:30 a 21:00 horas. Haberá unha única categoría mixta que abarca desde os 15 ata os 99 anos. O máximo de xogadores/as por equipo será de 5, mentres o mínimo está establecido en 3. As persoas que non teñan equipo, poden presenten igual no pavillón, xa que entre os/as que asistan formásense equipos. A inscrición é gratuíta e haberá facela de xeito presencial no propio pavillón. Tamén se fará un concurso de triplos.

A Xunta de Goberno Local vén de aprobar o expediente de licitación, mediante procedemento aberto simplificado, tramitación anticipada, con varios criterios de adxudicación, do contrato de obras de rexeneración do campo de fútbol de céspede artificial de Bertamiráns. A licitación deste proxecto faise despois do convenio asinado entre a Deputación da Coruña e mailo Concello de Ames a través do cal se van investir 357.303 euros, para dotar a esta instalación dun novo terreo de xogo de céspede artificial de última xeración e dunha bancada máis cómoda para os espectadores. O convenio para cofinanciar ditos traballos foi aprobado o pasado 13 de setembro no pleno da Deputación da Coruña. A Deputación achegará o 80% da contía total, 285.906 euros, mentres que o Concello de Ames porá o 20% restante, 71.397 euros.

O pasado venres, 29 de novembro, realizouse a entrega de premios do proxecto Youtubeir@s no Teatro Principal de Santiago de Compostela. Patricia de Lorenzo, o DJ Manu TF e a graffiteira Iria Fafián animaron a gala dos Premios Youtubeir@s, na que houbo 27 finalistas. Nesta terceira edición concorreron 252 vídeos e canles participantes. Youtubeir@s é unha iniciativa organizada polos servizos de Normalización Lingüística dos concellos da Baña, Ames, Carballo, Cedeira, Moaña, O Grove, Ourense, Ribadeo, Pontevedra, Rianxo, Santiago e Teo, das universidades da Coruña, Santiago e Vigo e da Deputación da Coruña.

Esta mañá presentouse na Casa da Cultura do Milladoiro a programación do Delas Fest, o  primeiro Festival Feminista de Arte Urbana e Contextual de Europa organizado por 7H Cooperativa Cultural. Celebrarase do 9 ao 15 de decembro nos concellos de Ames, Santiago e Teo. Na rolda de prensa que tivo lugar na Casa da Cultura do Milladoiro contouse coa presencia da concelleira de Benestar Social, Luísa Feijoo, as coordinadoras do departamento de proxectos de 7H Cooperativa Cultural, Eva Agra e Clara R. Cordeiro, e persoal do Centro de Información á Muller do Concello de Ames.