O Concello de Ames, a través da Oficina de Voluntariado, organiza un novo curso de inglés básico para maiores. O curso desenvolverase por primeira vez no Milladoiro e está dirixido para persoas maiores que non teñan ningún tipo de formación en lingua inglesa. As clases comezarán este vindeiro 12 de febreiro e serán impartidas por unha profesora voluntaria. Serán os mércores e venres, en horario de 16.00 a 17.00 horas no Local Municipal situado na Rúa Agro do Medio n.º 8 (Antigo Centro de Saúde). Ofértanse un total de 12 prazas, que se cubrirán por rigorosa orde de inscrición. Para participar, hai que enviar un correo electrónico ao enderezo voluntariado@concellodeames.gal ou a través do teléfono 662 377 044.

O Concello de Ames presentou esta mañá, na Casa do Concello en Bertamiráns, unha ampla e variada programación con Apego para a primeira metade de 2025, na que a música vai ter un papel relevante. O obxectivo central de todas estas actividades é achegarlles recursos ás familias que faciliten a transmisión da lingua e favorezan unha crianza positiva e con moito apego polo noso. A programación abre este venres, 31 de xaneiro, coa obra de teatro KYOKI de Elefante Elegante, dirixida a crianzas a partir dos 3 anos. Este espectáculo inclúese dentro da programación de artes escénicas de Ames, dependente do departamento de Cultura. As entradas pódense adquirir xa en abilleteira.concellodeames.gal. Premendo nesta ligazón podes descargar a programación completa do programa infantil con Apego.

A unidade móbil de doazón de sangue estará este xoves, 30 de xaneiro, en Bertamiráns, na praza de Chavián (xunto á zona de carga e descarga da avenida da Maía). O horario de atención será de 9:30 a 14:30 horas e de 15:30 a 21:00 horas. Na situación actual, a unidade traballa cun protocolo que garante a seguridade do persoal sanitario e das persoas doantes. Ademais, disponse dun teléfono gratuíto para consultar as dúbidas sobre a doazón, o número 900 100 828.

O Concello de Ames presentou esta mañá, na Escola Infantil municipal O Bosque, “Os Bolechas: A Carballeira dos trasnos”, un conto protagonizado polos populares personaxes dos Bolechas e ambientado na Carballeira dos Trasgos localizada en Ventín. Este proxecto vén nado para poñer en valor este espazo natural, así como para dalo a coñecer entre os máis pequenos de Ames.