A Casa do Concello, en Bertamiráns, acolleu esta mañá a presentación das actividades do “Entroido Ames 2025”, que se desenvolverán entre a última semana de febreiro e comezos do mes de marzo. O programa, organizado entre o Concello de Ames e a asociación Xuntanza de Empresarios de Ames (XEA), contará con diferentes propostas para todas as idades, dende o entroido do programa Amessan, actuacións de baile e danza, o concurso e desfile de Entroido no Milladoiro e a festa e concurso infantil para os máis pequenos.Pódense consultar as bases para participar no concurso de disfraces do domingo día 2 na seguinte ligazón. Tamén se poden consultar as bases do concurso de disfraces infantil do día 3 na seguinte ligazón. 

A Biblioteca municipal de Ames, que xa presentou a súa programación de contacontos, continúa tamén cos obradoiros adicados á rapazada que cursa de 3º de primaria en diante. No mes de febreiro, como non podía ser doutra maneira, o obradoiro conmemora o Día de Rosalía, que se celebra o 23 de febreiro. O prazo de inscrición para participar no obradoiro “Día de Rosalía: crea e debuxa!” estará aberto do 10 ao 18 de febreiro. Durante o ano 2024 participaron 230 rapaces e rapazas nos obradoiros organizados nas bibliotecas de Bertamiráns e do Milladoiro.

O Concello organiza, por terceiro ano consecutivo, un cocido para as persoas maiores do concello. Trátase dun xantar que se celebrará o martes 4 de marzo, martes de Entroido, a partir das 14.00 horas, no pavillón de Bertamiráns. No xantar servirase cocido para as persoas maiores de 65 anos empadroadas en Ames. O xantar será gratis, pero haberá que reservar praza chamando, de luns a venres, en horario de 9.00 a 14.00 horas, aos números de teléfono: 881 074 730 / 669 119 431 / 662 377 044. O prazo para inscribirse estará aberto ata o 21 de febreiro. Posteriormente, haberá que retirar o tícket do xantar do 24 ao 28 de febreiro na Casa do Concello (departamento de Gabinete de Alcaldía) ou nas Casas da Cultura de Bertamiráns e do Milladoiro. Haberá servizo de autobús polas parroquias para acudir ao xantar e volver para casa. Anímase á veciñanza a acudir ao xantar disfrazados.

O auditorio da Casa da Cultura de Bertamiráns acolleu este pasado xoves, 6 de febreiro, a primeira xuntanza ordinaria do Pleno do Consello sectorial da Cultura de 2025. En dita xuntanza presentouse o informe – memoria Ames Cultura de 2024, no que se recolle a actividade de dinamización cultural, das bibliotecas municipais e da escola de música durante o ano pasado. Ademais, fíxose un avance sobre a programación de dinamización cultural que está pechada para 2025; e falouse de posibles cambios nas distintas liñas de subvencións que dependen do departamento de Cultura. Pódese consultar o informe completo na seguinte ligazón.