O Concello de Ames participou o pasado mércores, 21 de outubro, na xornada “Vivenda, exclusión social e participación cidadá. O papel dos municipios como garantes de dereitos”, que se desenvolveu no Centro de Estudos Avanzados da Universidade de Santiago de Compostela. Participou a través do Departamento de Benestar Social do Concello, e estiveron presentes  o  Técnico de Mediación Intercultural, Leonardo Pena, e  a Asesora Xurídica de Servizos Sociais, Raquel Dopico. Durante o encontro, ambos abordaron a situación na que se atopa a vivenda no concello de Ames, e expuxeron os programas Vivenda en tránsito e Vivendas baleiras, dúas iniciativas levadas a cabo no concello.

Comezou o Festimax 2026, e fíxoo onte na Casa da Cultura de Bertamiráns coa maxia para bebés “Patapatún” do Mago Paco. Así arrincou a vixésimo primeira edición desta iniciativa tan asentada e aclamada no municipio. O festival, organizado polo Concello de Ames, en colaboración coa Deputación da Coruña, conta cun amplo programa de espectáculos e obradoiros para todos os públicos. O espectáculo encargado de abrir a semana máxica foi o de maxia para bebés do Mago Paco, seguido hoxe por Martilda, que visitou esta mañá ás persoas maiores de Bertamiráns. A programación continua ao longo do venres, sábado e domingo. Na actualidade, queda algunha entrada solta para as sesións da Gala Máxica Internacional, en Bertamiráns, que poden adquirirse a través da Billeteira electrónica. Para os obradoiros de maxia quedan algunhas prazas dispoñibles. Os interesados en participar que se acheguen polas Casas da Cultura.

O programa Apego continúa a súa programación habitual para as pequenas e pequenos do concello durante os últimos meses do ano. Esta vez, a actividade que está por desenvolverse é o espectáculo Contos para caghar patatillas, de Brais das Hortas. Trátase dunha proposta chea de contos, música, humor, efectos especiais e participación do público. A través de todos estes recursos, os contos falan da valentía, e de que non é valente que non ten medo, senón quen é capaz de enfrontarse a el. Esta actividade, que é de balde, e que está dirixida a familias con crianzas de 3 anos en adiante, celebrarase o venres 30 de outubro, ás 18.00 horas, na Casa da Cultura do Milladoiro. O prazo de inscrición está aberto desde hoxe, xoves 22 de outubro, ata o vindeiro día 29 de outubro.

O Concello de Ames, a través da Oficina de Voluntariado, organiza un novo curso de inglés básico para maiores. O curso desenvolverase en Bertamiráns e está dirixido a persoas maiores que non teñan ningún tipo de formación en lingua inglesa. As clases comezarán o 27 de outubro e serán impartidas por unha profesora voluntaria. Serán os martes, en horario de 12.00 a 13.00 horas na Casa dos Maiores. Para participar, hai que enviar un correo electrónico ao enderezo voluntariado@concellodeames.gal ou a través do teléfono 662 377 044.