O Concello de Ames, Augas de Ames EPEL e El Correo Gallego organizan o vindeiro martes, 10 de novembro, no auditorio da Casa da Cultura do Milladoiro, o foro “A auga en Galicia, da abundancia á escaseza”, no que se abordará a planificación de infraestruturas hídricas, xestión da escaseza e colaboración interadministrativa. O foro estará presentado pola xornalista de El Correo Gallego,  Susana López Carbia; e contará coa participación do alcalde de Ames, Blas García, da subdelegada do Goberno en Galicia, Encarna Rodríguez, do subdirector xeral de Xestión e Execución de Infraestruturas Hidráulicas de Augas de Galicia, Agustín Hernández, da xerente de Augas de Ames, Genma Otero, da enxeñeira xefa do servizo de Augas de Ames, Verónica Castro, do técnico municipal, Esteban de la Fuente, do director de servizos de Espina & Delfín, Juan José Somoza; e do enxeñeiro de camiños, canles e portos de Zelig Strategy, Joaquín Álvarez.

O Festival Internacional de Cinema Infantil Cinema Miúdo celebrará do 12 ao 15 de novembro en Ames a súa novena edición, co poder da ciencia como fío condutor da súa programación. O certame reúne curtametraxes internacionais para todas as idades e completa a programación con sesións especiais fóra de concurso, obradoiros e actuacións abraiantes para achegar o cinema e outras disciplinas ao público infantil e familiar. Os abonos están dispoñibles na Billeteira electrónica por 3 euros. Ata o de agora hai vendidos 130 bonos, polo que quedan dispoñibles 170.

Desde as 11.00 horas de hoxe, 4 de novembro, e ata as 11:00 horas do venres, 6 de novembro, está aberto o prazo para decidir os premios do público. Os vídeos presentados ao concurso Galetiktokers xa están publicados no perfil de Instagram @xuventudeames. Esta iniciativa dos departamentos de Xuventude e Normalización Lingüística do Concello de Ames pretende estimular a creatividade da mocidade animando á creación audiovisual en galego. Gañará o premio do público en cada categoría o vídeo con maior alcance, é dicir, o que se faga máis viral en 48 horas. Calquera persoa pode apoiar os seus vídeos favoritos véndoos e compartíndoos. Nesta sétima edición presentáronse 40 vídeos, realizados por 78 mozos/as de 24 localidades distintas. Premendo nesta ligazón pódese consultar o folleto informativo do VII Certame Galetiktokers.

Distrito 13 17 continúa con actividades para os mozos e mozas de Ames neste mes de novembro. A primeira actividade proposta para este mes é a Velada Enxeño este sábado 7 de novembro, unha velada para poñer a proba o enxeño dos participantes, que terá lugar no Anexo ao Pavillón do Milladoiro. Por outra banda, o venres 20 de novembro terá lugar a Ruleta da Igualdade no Pazo da Peregrina en Bertamiráns, unha actividade na que se aprenderá sobre igualdade dun xeito divertido e dinámico. Ambas actividades se desenvolverán de 19.00 a 21.00 horas. Podes anotarte na seguinte ligazón. Para máis información, as persoas interesadas poden contactar en info@anacoseducativos.com ou no 694 216 484. Podes consultar toda a programación na seguinte ligazón.