Os/as atletas do Ames Atletismo Savante realizaron unha gran actuación no campionato de España de marcha atlética en ruta por federacións celebrado o pasado domingo, 15 de febreiro, en Cieza. Participaron 4 atletas do Ames Atletismo, sendo o club que máis atletas aportou á selección galega. Nicolás Collazo fixo unha gran carreira logrando o subcampionato de España sub20 e o récord galego sub20 dos 10 km marcha en ruta. Ademais, na proba de 10 km marcha sub20 tamén participaron Nadir Moreira e Icía Ares. Por último, destacar a gran actuación do amesán Juan Pernas na proba de 5 km marcha sub16, onde co resto de compañeiros da selección galega gañaron a competición por equipos.

A atleta amesá, María Estévez, segue logrando éxitos. Desta volta, conseguiu a medalla de ouro coa selección galega sub20 no campionato de España de campo a través individual e por federacións autonómicas, que se celebrou este pasado domingo, 25 de xaneiro, no circuíto “El Pinillo” de Almodóvar del Río (Cordoba). Trátase dunha vitoria histórica para o atletismo galego. O equipo sub20 estivo formado por Sandra González, Demeku Paniagua, Debris Paniagua, Sabela Martínez e María Estévez.

A atleta do club Ames Atletismo Savante, Icía Ares, vén de proclamarse campioa de España sub 18 na proba de 5.000 marcha. A deportista do club amesán, que competiu baixo as cores do club Ourense Atletismo, logrou a medalla de ouro no campionato nacional celebrado en Castellón. Ademais, Icía Ares remata a tempada coa magnífica nova da convocatoria da selección española de atletismo para participar no campionato Iberoamericano do 19 e 20 de xullo en Paraguay.

O club de atletismo MillaRaio comezou a tempada cuns excelentes resultados no campionato provincial de campo a través celebrado na Pobra do Caramiñal o pasado 14 de decembro. Participaron en dito campionato os equipos das categorías sub10, sub12 e sub14. Clasificáronse para o campionato galego o equipo sub10 masculino, que foi campión provincial, e o equipo feminino sub12, que foi subcampión provincial.