Ames contará co seu propio mercado de horta e artesanía todos os sábados pola mañá, a partir do mes de setembro. Esta iniciativa, enmarcada dentro do Plan de Acción da Axenda Urbana de Ames, pretende fomentar o consumo de produtos de proximidade, dinamizando a economía e produción local. O mercado estará localizado na Praza da Maía, en Bertamiráns, en horario de 10.00 a 13.30 horas e contará con 13 postos de venda. O prazo para solicitar un espazo neste novo mercado estará aberto desde mañá, 31 de xullo, ata o vindeiro 21 de agosto. As solicitudes poden presentarse enviando o impreso de solicitude cuberto a través da Sede electrónica ou de forma presencial nas oficinas municipais de Bertamiráns e do Milladoiro. Mañá ás 12.00 horas, no Salón de Plenos do Concello, haberá unha presentación informativa sobre o funcionamento do mercado. 

Este venres, 18 de xullo, vaise a celebrar a segunda edición do concurso Baila con Ames. Será a partir das 18.00 horas no auditorio da Casa da Cultura de Bertamiráns. Nesta edición están inscritos un total de 77 participantes, que estarán divididos nas categorías individual, parellas ou tríos (dirixida a formacións de 2 ou 3 persoas como máximo) e grupos (para formacións de mínimo 4 persoas e un máximo de 12). O xurado, formado por Daniela Filloy, Magaly Balsa e Dora Iglesias, terá que decidir os catro premios que se outorgan por cada categoría. Repartirase un total de 3.900 euros en premios e seis vales de 100 euros cada un para gastar no comercio local. A entrada será libre ata completar aforo.

Este venres, 11 de xullo, o Espazo de Coworking A Proa acollerá a charla aberta ao público “E ti, coñeces a fórmula?”, unha sesión divulgativa sobre o emprendemento cooperativo enmarcada dentro do Programa de sensibilización para o emprendemento cooperativo. A xornada é de balde e terá lugar de 10.00 a 12.30 horas e estará impartida por Rosa Álvarez, técnica de EspazoCoop. Para participar é preciso inscribirse a través da seguinte ligazón. 

Este sábado, 28 de xuño, bota a andar a segunda edición do concurso Baila con Ames. Farao coa fase de preselección, que se vai a celebrar dende ás 18.00 horas, nas pistas deportivas que se atopan ao carón da Casa da Cultura do Milladoiro. Están inscritos un total de77 participantes, que estarán divididos nas categorías individual, parellas ou tríos (dirixida a formacións de 2 ou 3 persoas como máximo) e grupos (para formacións de mínimo 4 persoas e un máximo de 12). Nesta fase, o xurado seleccionará un máximo total de 21 participantes entre todas as categorías. Tras todas as exhibicións, comunicarase a listaxe de persoas clasificadas para a fase final. As persoas clasificadas poderán enviar ata o 14 de xullo a pista musical escollida para a derradeira exhibición.