Ames conmemora o Día Mundial do Teatro coa publicación dun vídeo que protagonizan os rapaces e rapazas que integran a Escola Municipal de Teatro. A través deste vídeo queren compartir a súa paixón pola escena e desexarlle a toda a veciñanza un día cheo de arte, emoción e moita maxia teatral. Actualmente estase desenvolvendo a programación cultural do primeiro semestre de 2026, que inclúe 12 espectáculos de teatro, danza e circo e que se representan de xaneiro a maio. Preme nesta ligazón para ver o manifesto galego no Día Mundial do Teatro 2026.

A Xunta de Goberno Local do Concello de Ames aprobou o pasado 5 de marzo as convocatorias de subvencións para a promoción de festas populares e actividades levadas a cabo polas asociacións culturais no exercicio 2026. O prazo para solicitar estas axudas, que suman unhas contías de 30.000 euros para as actividades culturais e de 25.000 euros para as festas populares, estará aberto ata o 10 de abril. Premendo nestas ligazóns pódese obter máis información sobre a convocatoria para as festas populares e para as actividades levadas a cabo por asociacións culturais.

A programación do Ames Cultural continúa este venres, 13 de marzo, coa obra Riazor Ostia, ás 20.30 horas na Casa da Cultura de Bertamiráns. Trátase da nova produción de Os Náufragos teatro en colaboración coa AGADIC. Con texto e dirección do dramaturgo coruñés Gustavo del Río, Riazor Ostia preséntase como un poema escénico que dialoga coa memoria, o odio e a resistencia. Esta representación teatral forma parte do convenio de colaboración entre a Axencia Galega das industrias Culturais (AGADIC) e o Concello de Ames. As entradas están dispoñibles na Billeteira Electrónica do Concello de Ames. Podes consultar a programación completa do Ames Cultural premendo nesta ligazón.

O Concello de Ames, a través da Concellería de Cultura, informa de que está aberto desde o 21 de febreiro ata o 7 de marzo (ambos incluídos) o prazo de inscrición para que as agrupacións musicais non profesionais do concello de Ames participen nas festas populares ou actividades orientadas á dinamización sociocultural de 2026. Posteriormente, os grupos de música tradicional e corais non profesionais inscritos poderán ser solicitadas por asociación e comisións de festas municipais dentro da convocatoria de subvencións en especies para as festas populares celebradas no 2026. A contía total desta liña de axudas en 2026 ascenderá a 24.000 euros.