O Concello de Ames, a través do departamento de Persoal, informa sobre a acta 1 do tribunal do proceso de técnico de secretaria cos resultados da baremación dos méritos correspondentes á fase de concurso. Trátase do proceso selectivo dunha praza por concurso-oposición do artigo 2 da lei 20/2021 incluída na oferta extraordinaria de emprego público de 2022 (estabilización).

Desde o martes, 26 de maio, e ata o luns 8 de xuño, está aberto o prazo para que novo alumnado presente as súas solicitudes de praza na Escola Municipal de Música de Ames, a EMMA, de cara ao vindeiro curso 2026-2027. A inscrición pode realizarse a través da Sede electrónica do Concello de Ames, ou ben de xeito presencial nos rexistros municipais ou por calquera dos outros medios recollidos no artigo 16.4 da Lei 39/2015. Para entregar a documentación de xeito presencial nos rexistros municipais non é preciso solicitar cita previa. Está previsto que as clases comecen o 14 de setembro.

O Concello de Ames, a través dos departamentos de Normalización Lingüística e Turismo, organizou para este domingo 7 de xuño unha andaina polo Mar de Ovellas. Esta actividade, incluída na programación de Rosalía 2026, estará teatralizada polos Quinquilláns e Lupe Blanco. A andaina rematará no local social de Trasmonte cunha pequena festa con música e degustación de petiscos. Dende o departamento de Normalización Lingüística informan que quedan as últimas prazas libres para esta actividade. As persoas que queiran participar teñen que escribir un correo electrónico ao enderezo normalizacion@concellodeames.gal.

O Concello de Ames, a través da Concellaría de Educación, informa da publicación das listaxes de solicitudes presentadas de novos/as usuarios/as nos servizos complementarios de educación (Bos Días Cole, Tardes Divertidas e Comedores Escolares) para o curso 2026-2027. O prazo de emendas ou reclamacións é de 10 días hábiles, do 1 ao 12 de xuño de 2026. Unha vez finalizado dito prazo publicaranse as listas de admitidos/as nos servizos e informarase do prazo de matricula.