Do 2 ao 31 de outubro está aberto o prazo para que os centros educativos inscriban os seus equipos na XII edición do Club de Debate. O Club de Debate é unha actividade de dinamización lingüística dirixida a mozas e mozos de 3º e 4º da ESO, 1º de bacharelato ou dos ciclos formativos que comprendan as mesmas idades. Os equipos que se inscriban teñen que ser mixtos e estar formados por entre 4 e 10 persoas máis o/a preparador/a (persoal docente ou PAS). Os equipos deben facer a inscrición a través do formulario que se facilite desde o SNL do Concello de Ames. Como novidade destacamos que este ano se aumentaron os premios das fases de zona. Serán 800 euros para o equipo mellor clasificado e 500 para o segundo. O premio da fase final é unha viaxe multiaventura dunha fin de semana á que asistirán os dous equipos con maior puntuación. Premendo nesta ligazón podes descargar o impreso de inscrición.

A praza de Chavián, en Bertamiráns, acolleu esta mañá a presentación da cuarta edición do concurso Galetiktokers, organizado polos departamentos de Xuventude e Normalización Lingüística de Ames. O certame volve por cuarto ano consecutivo, co obxectivo de estimular a creatividade entre a mocidade, incentivar a creación de vídeos en galego con novos formatos e temáticas, e dar visibilidade á comunidade galega na rede social TikTok. A rapazada a partir dos 13 anos poderá participar cos seus vídeos en galego ata o 23 de outubro, solicitando un formulario de inscrición no correo galetiktokers23@gmail.com e devolvéndoo cuberto e asinado xunto coa súa creación audiovisual. Haberá seis premios de 300 euros cada un, que se repartirán nunha gala que terá lugar o 10 novembro de 2023. Premendo nesta ligazón pódense consultar as bases ao completo do IV Certame Galetiktokers.

O programa Apego prosegue coas súas propostas para o mes de setembro. Desta volta, ábrese a inscrición para participar no danzacontos “Viaxando coas anduriñas: ritmos na selva”, que se vai desenvolver no Pazo da Peregrina de Bertamiráns o vindeiro venres, 22 de setembro, ás 18:00 horas. Os/as interesados/as en anotarse poden facelo enviando un correo electrónico ao enderezo normalizacion@concellodeames.gal ata o 21 de setembro, no que se indiquen nome e apelidos das persoas asistentes, idade dos nenos/as e un número de teléfono de contacto. A programación do Apego para o último semestre do 2023 pode consultarse premendo nesta ligazón. 

Ao abeiro do programa Apego, a Concellaría de Normalización Lingüística pon en marcha un ano máis as Brincadeiras Miúdas, dúas xornadas de xogos tradicionais, música, obradoiros e creación libre de xoguetes que se desenvolverán o día 6 de setembro no parque do Ameneiral, en Bertamiráns, e o xoves 7 na Carballeira de Ventín do Milladoiro. As brincadeiras estarán dinamizadas por Cé Orquestra Pantasma, un polifacético músico especializado en animación infantil, no fomento do xogo libre e en achegar as crianzas á natureza. A actividade diríxese ao público familiar. Celebrarase en ámbalas dúas xornadas ás 18:00 horas, de balde e sen inscrición previa. A programación ao completo pode consultarse premendo nesta ligazón.