A novena edición dos Premios Youtubeiras+ xa ten finalistas. Un total de 28 canles aspiran a levar algún dos sete galardóns deste certame organizado polos servizos de normalización lingüística dos concellos de Ames, Carballo, Ferrol, Moaña, Narón, Oleiros, Pontevedra, Rois, Santiago de Compostela e Teo, das universidades de Santiago, A Coruña e Vigo e mais da Deputación da Coruña. As persoas e canles gañadoras destes galardóns, que teñen como obxectivo promocionar o talento en galego nas redes sociais, daranse a coñecer durante unha gala que este ano terá lugar no Teatro Jofre de Ferrol o sábado 7 de febreiro. Presentarana Leila Fernández (que forma parte da canle O faiado pódcast) e Carlos Vieito (integrante do proxecto Exército Mekemeke). Anunciárono así esta mañá en rolda de prensa o alcalde de Ferrol, José Manuel Rey Varela; a concelleira de Educación, Universidade e Política Lingüística de Ferrol, Patricia Cons, e a deputada de Igualdade, Lingua e Dereitos Civís da Deputación da Coruña, Sol Agra. Preme nesta ligazón para consultar a relación de finalistas.

Desde hoxe ata o 6 de marzo estará aberto o prazo de inscrición no certame de regueifas en vídeo do Enreguéifate, o proxecto impulsado polos servizos de normalización lingüística dos concellos de Ames, Arzúa, Carballo, Pontevedra, Santiago de Compostela e Teo, centrado na divulgación e posta en valor da improvisación oral en verso en lingua galega.

O auditorio da Casa da Cultura do Milladoiro acolleu este luns pola tarde a Gala de entrega da oitava edición dos Premios Lingua e Empresa, organizada polas Concellarías de Normalización Lingüística e de Promoción Económica. As empresas galardoadas foron O Zapateiro, na categoría A de uso consolidado da lingua galega, e Pés Nus, na categoría B de nova incorporación á lingua, ambos establecementos situados na localidade de Bertamiráns. Os dous representantes das empresas gañadoras recibiron unha figura conmemorativa e un diploma, que se engaden á dotación de 1.500 euros e á campaña de difusión publicitaria en Ames Radio.

O Concello de Ames, a través do Servizo de Normalización Lingüística e do departamento de Promoción Económica, organizou a VIII edición dos Premios Lingua e Empresa, unha iniciativa que busca estimular o uso da lingua galega no ámbito empresarial. Nesta oitava edición presentáronse 32 entidades establecidas en Ames e delas, o xurado  recoñecerá dúas, unha na categoría de uso consolidado e outra na de nova incorporación. As gañadoras desvelaranse o vindeiro luns, 15 de decembro, ás 20.30 horas, na Casa da Cultura do Milladoiro, nunha gala que contará coa actuación de Leti da Taberna.