O IES do Milladoiro é o novo equipo campión do Club de Debate Alingua. Os anfitrións conseguiron o título este sábado no auditorio da Casa da Cultura de Bertamiráns. Os vixentes campións e gañadores das dúas anteriores edicións, o IES Terra de Xallas, soben tamén ao podio, mais desta volta no segundo chanzo.

A explanada do pavillón de deportes de Bertamiráns acolleu este venres, 17 de abril, o festival de música infantil, Modo Galego, actívao! onde se xuntaron centos de rapaces e rapazas xunto as súas familias, para cantar e bailar co grupo de música tradicional amesá As Mainas, e con dúas das bandas máis potentes do panorama da música infantil en galego: A Gramola Gominola e Uxía Lambona e a Banda Molona. Con esta gran festa pechouse a cuarta edición deste programa que está organizado polo Concello de Ames e a Real Academia Galega, en colaboración coa Xunta de Galicia.

A explanada do pavillón de deportes de Bertamiráns acollerá este venres, 17 de abril, ás 17.30 horas, o festival de música infantil, Modo Galego, actívao! Trátase dunha festa coa que se pechará a cuarta edición deste programa que está organizado polo Concello de Ames e a Real Academia Galega, en colaboración coa Xunta de Galicia. No dito festival actuarán o grupo de música tradicional amesá As Mainas, e dúas das bandas máis potentes do panorama da música infantil en galego: A Gramola Gominola e Uxía Lambona e a Banda Molona. Poderá asistir todo o alumnado dos centros de ensino de educación infantil e primaria participantes este ano no programa Modo Galego, xunto coas súas familias. Tamén poden recoller un convite no Servizo de Normalización Lingüística as familias que forman parte do Programa Apego. A apertura de portas será ás 17.00 horas.

O departamento de Normalización Lingüística do Concello de Ames organizou este sábado 11 de abril, no auditorio da Casa da Cultura de Bertamiráns, un acto para presentar o libro antolóxico do XXII Certame Literario. A dito acto acudiron a maior parte dos gañadores e gañadoras do certame literario de 2025, así como varios representantes da Corporación municipal, entre os que se atopaban o alcalde e concelleiro de Normalización Lingüística. O acto estivo presentado pola xornalista amesá Paula Pérez Cantelar e amenizado polo dúo musical Xeito de dous.