O prazo de inscrición para a Foliada con Apego xa está aberto. Dende este mércores, 13 de maio, as persoas interesadas poderán inscribirse nesta actividade chea de música para compartir, cantar, bailar, aprender cancións e, sobre todo, pasalo ben. A foliada estará conducida polas cantareiras e pandeireteiras María e Carme da Pontragha, que nos achegarán ao patrimonio musical galego cantando e bailando todas xuntas o venres, 22 de maio, ás 18.00 horas no Pazo da Peregrina de Bertamiráns.  

Para participar só se precisa enviar un correo electrónico ao enderezo normalizacion@concellodeames.gal no que se indiquen o nome da actividade, nome e apelidos das persoas asistentes, teléfono de contacto e idade dos/as nenos/as que vaian participar. O prazo para anotarse está aberto dende hoxe ata o vindeiro xoves 21 de maio. As prazas asignaranse respectando a orde de recepción das solicitudes, e non se admitirán inscricións fóra do período de inscrición. 

O programa Apego, un vehículo de transmisión da lingua
O programa Apego é un proxecto de dinamización lingüística dirixido ás familias que estean a esperar un bebé ou que teñan crianzas entre 0 e 6 anos. O seu obxectivo é promover, apoiar e normalizar o uso do galego na socialización da primeira infancia, achegando recursos e unha ampla proposta de actividades lúdicas, creativas e educativas.

As persoas interesadas en sumarse á iniciativa poden facelo poñéndose en contacto co Servizo de Normalización Lingüística do Concello de Ames, escribindo un correo a normalizacion@concellodeames.gal ou chamando ao número de teléfono 662 377 215. Así mesmo, tamén poden facelo cubrindo o formulario “Súmate ao apego”, que está dispoñible na páxina web do programa, apego.gal.

Novas relacionadas

El Correo Gallego: "Ames celebra unha Foliada con Apego para achegar o galego ás familias"