O Concello de Ames, a través da Concellaría de Benestar Social e Igualdade, organiza dous cursos formativo en defensa persoal feminina, que se van impartir o sábado, 27 de setembro, en Bertamiráns e no Milladoiro. Os cursos impartiranse pola mañá, de 10:00 a 14:00 horas, na Casa da Cultura de Bertamiráns, e pola tarde, de 16:00 a 20:00 horas, na Casa da Cultura do Milladoiro. Son dous cursos diferentes de catro horas cada un. Impartiranse primeiro pola mañá en Bertamiráns e despois pola tarde no Milladoiro. Dita formación estará impartida por Juan José Martínez de Método Mas e está dirixida a mulleres maiores de idade. Para participar hai que inscribirse chamando aos número de teléfono 981 89 09 64 / 981 53 59 41 das Unidades Municipais de Servizos Sociais de Bertamiráns ou do Milladoiro.

Dende a Concellaría de Benestar Social lembran que está aberto o prazo de inscrición para as actividades do programa Amessán 2025-2026. Este ano hai varios cambios no proceso de inscrición respecto da edición  anterior. Para inscribirse non é necesario presentar o volante de padrón. Unha vez rematado o período de inscrición e estean elaboradas as listaxes de usuarios/as inscritos/as comprobarase que as persoas inscritas estean empadroadas no concello de Ames, requisito necesario para poder participar no programa. Outro dos cambios é que as persoas que participen en grupos impartidos en locais sociais das parroquias, poderán facer a inscrición o primeiro día de clase (non é necesario que se inscriban antes do inicio das actividades). Pódese consultar a programación completa de Amessán para o curso 2025-2026 nesta ligazón.

Hoxe presentouse a programación de actividades de Amessán para o curso 2025-2026. Respecto á edición anterior, retómase o grupo na parroquia da Ameixenda. Así mesmo, a asociación Arcea-Adames e o local de JUPEMI no Milladoiro acollerán algunhas das actividades do programa. Ademais, no Milladoiro e en Bertamiráns impártense dúas novas actividades: calma e serenidade e canta troula. O programa Amessán inclúe unha ampla oferta de actividades saudables para maiores de 60 anos e persoas con diversidade funcional. Impártense un total de 13 actividades en 14 lugares diferentes. As distintas actividades e obradoiros impartiranse en Bertamiráns e no Milladoiro, así como nos locais sociais de Agrón, A Ameixenda, Trasmonte, Oca, Augapesada, Bugallido, A Tarroeira, Cruxeiras, Tapia, Piñeiro, Lens a na Asociación Arcea-Adames. As actividades comezarán o 1 de outubro. Pódese consultar a programación completa de Amessán para o curso 2025-2026 nesta ligazón. 

Un ano máis, o Concello de Ames colabora co programa Vacacións en Paz, organizado pola Asociación Solidariedade Galega co Pobo Saharauí (SOGAPS). A través desta iniciativa, que se vén desenvolvendo dende hai máis de vinte anos, familias galegas acollen durante os meses de xullo e agosto a nenos e nenas saharauís. Nesta edición, en Ames hai acollidos un total de 8 nenos e nenas, que están pasando o verán no municipio ata os días 5 e 6 de setembro que volverán ao Sáhara. Os 8 rapaces e rapazas (catro nenos e catro nenas) repiten experiencia, xa que estiveron en Ames na pasada edición. As familias participantes tamén repiten, excepto unha familia que é nova este ano e acolleu a unha nena (Duaa).