A Oficina de Voluntariado de Ames, dependente da Concellaría de Benestar Social, organiza unha nova excursión a Portugal os días 18 e 19 de abril. A actividade está dirixida ás persoas que participan no programa Amessán. Durante dúas xornadas visitarase a cidade de Braga, Bom Xesús, Vilanova de Cerveira e A Fortaleza. A inscrición poderase tramitar de forma presencial este venres, 20 de marzo, de 12.00 a 14.00 horas, nas Casa da Cultura de Bertamiráns e do Milladoiro. Para máis información pódese chamar aos números de teléfono 662 377 044  ou 630 693 404. O custo da actividade é de 140 euros e inclúe desprazamento, seguro de viaxe, guías turísticos, hotel, almorzos, xantares e cea.

O Concello de Ames, a través da Concellaría de Benestar Social e Igualdade, organiza dous cursos formativo en defensa persoal feminina, que se van impartir o sábado, 21 de marzo, no Milladoiro e Bertamiráns. Os cursos impartiranse pola mañá, de 10:00 a 14:00 horas, na Casa da Cultura do Milladoiro, e pola tarde, de 16:00 a 20:00 horas, na Casa da Cultura de Bertamiráns. Son dous cursos diferentes de catro horas cada un. Impartiranse primeiro pola mañá no Milladoiro e despois pola tarde en Bertamiráns. Dita formación estará impartida por Juan José Martínez de Método Mas e está dirixida a mulleres maiores de idade.

O Concello de Ames, a través da concelleira de Benestar Social, Igualdade e Voluntariado, Uxía García, estará representado no II Encontro Internacional de Mulleres Electas “As Elixidas”, que reunirá os días 12 e 13 de marzo a máis de 130 alcaldesas e concelleiras de Cabo Verde, Mozambique e Galicia co fin de fomentar a participación efectiva das mulleres no poder local e impulsar políticas municipais con perspectiva de xénero. Unha ducia de concellos galegos estarán representados nas xornadas que se celebrarán na cidade de Praia baixo o lema “Electas no local, unha voz global”, organizadas polo Fondo Galego de Cooperación e Solidariedade e a Asociación Nacional de Municipios de Cabo Verde (ANMCV).

O auditorio da Casa da Cultura de Bertamiráns acolleu esta mañá a inauguración da décimo oitava edición da Xornada de técnicos/as e voluntarios/as, que organiza a entidade Special Olympics Galicia, coa colaboración do Concello de Ames e da Conselleira de Política Social e Igualdade da Xunta de Galicia. A xornada foi inaugurada pola directora xeral de Persoas con Discapacidade, Begoña Abeijón, e o alcalde de Ames, Blas García. Con esta actividade comeza a tempada deportiva 2026 de Special Olympics Galicia, que durará ata decembro con competicións deportivas cada mes.