As actividades de animación á lectura, que organiza a Concellaría de Cultura, amósalles ás nenas e nenos, mediante sesións de contacontos, o encanto que se atopa nos libros. Ao longo da próxima Semana haberá dúas sesións de contos nas bibliotecas do concello. A primeira será o mércores 22 de xaneiro na Biblioteca do Milladoiro, e o xoves 23 na Biblioteca de Bertamiráns, ambos ás 17.30 horas.

As sesións de contos abordarán ao longo deste curso diferentes temas, sempre relacionados con aspectos de interese e de actualidade na formación emotiva, artística e formal das nenas e nenos. Deste xeito, alén de fomentar o gusto pola lectura e o desenvolvemento da linguaxe, o que estas sesións procuran é promover a educación igualitaria e en valores, fortalecer o desenvolvemento cognitivo das crianzas e ofrecer ás familias unha actividade para gozar xuntas do seu tempo de lecer.

Cómpre engadir que xa está preparada a programación das bibliotecas municipais para os vindeiros meses. E aínda que se informará da programación completa nos próximos días, adiantar que en febreiro haberá dúas sesións (Milladoiro e Bertamiráns) de  “Contos para rir” o mércores 5 e o xoves 6, e outras dúas de “Nais, non hai dúas iguais” , o mércores 19 e o xoves 20. Todas serán ás 17.30 horas.