Moitas veciñas e veciños de Ames encheron o pasado venres, 25 de novembro, a sala de exposición do Pazo da Peregrina para participar no acto institucional do Día internacional da eliminación da violencia contra a muller. En dito acto o Concello de Ames, a través da Concellaría de Benestar Social e Igualdade, tivo unha lembranza para as 37 mulleres asasinadas por violencia de xénero en España no que vai de ano. Deste xeito, colocáronse para o acto 37 pares de zapatos, un por cada muller que foi asasinada vítima de violencia de xénero ao longo do ano 2022. Os zapatos tiñan escritos o nome das vítimas como maneira de visibilizar o espazo que ocupan as mulleres que faltan e a lacra que supón para a sociedade a violencia machista.

O acto comezou cunha charla - coloquio que estivo impartida por María Angélica Mercado Torres, especialista universitaria en Estudos de xénero e políticas de igualdade. Nesta charla abordáronse diferentes temas como os estereotipos de xénero, conceptos sobre a feminidade VS masculinidade, sexismo, as agresións sexuais e maila violencia sexual. Este charla estivo enmarcada dentro do conxunto de accións contra a violencia de xénero da Secretaría Xeral de Igualdade, dirixidas á rede de entidades locais. Ademais, a realización desta actividade forma parte dun acordo de colaboración asinado coa Federación galega de municipios e provincias.

A continuación, deuse lectura ao manifesto institucional con motivo do 25N asinado por todos os grupos políticos con representación na Corporación municipal do Concello de Ames. O manifesto foi lido pola concelleira de Benestar Social e Igualdade e voceira do grupo municipal socialista, Luísa Feijóo; a concelleira de Economía e Facenda e voceira do grupo municipal de Contigo Podemos, Genma Otero; a concelleira de Normalización Lingüística e Mocidade e concelleira do grupo municipal do Bloque Nacionalista Galego,  Escarlata Pampín; polas concelleiras do grupo municipal popular, Oliva Agra e María Belén Castro; e polo concelleiro do grupo municipal mixto, José Ramón Oulego, pertencente a Ciudadanos.

Ao longo do acto tamén se repartiu merchandising co lema da campaña deste ano “Que o meu machismo non se converta no teu problema”. Ademais, houbo unha actuación do alumnado do combo de voces da Escola Municipal de Música de Ames que cantaron o tema “Ni una más” de Aitana. O acto rematou con todas as persoas asistentes ao acto berrando BASTA XA!

A concelleira de Benestar Social e Igualdade, Luísa Feijóo, dixo sentirse “emocionada  por ver o Pazo da Peregrina cheo de persoas co mesmo sentimento que é o de conseguir unha sociedade igualitaria, loitando contra as violencias machistas, homes e mulleres expoñendo as súas vivencias, os seus sentimentos... É difícil explicar con palabras tantas sensacións, tantas emocións, tantos sentimentos. Emocionada tamén polo silencio e as bágoas que provocou a fantástica interpretación do combo da EMMA e por sentir o Pazo vibrar ao berro de BASTA XA!”.

A concelleira engadiu que o obxectivo do acto foi “concienciar sobre as desigualdades que aínda existen a día de hoxe na nosa sociedade, para sensibilizar sobre as violencias que se seguen a exercer sobre as mulleres, e para non esquecer que temos que seguir nesta loita, e que, máis que nunca, debemos estar toda a sociedade unida e que a responsabilidade é de todos e de todas”. “Coa igualdade non gañamos as mulleres, gaña toda a sociedade”, concluíu.

Premendo nestas ligazóns podes ver os vídeos cargados no Instagram da EMMA sobre a actuación feita no acto do 25N e tamén os vídeos do club de patinaxe artística Omega e da biblioteca do CEIP Agro do Muíño con motivo do 25N.

Programación dende o 17 de novembro ata o 1 de decembro
O programa do Concello de Ames con motivo do 25N deu comezo o pasado 17 de novembro, coas andainas contra a violencia de xénero organizadas dende o programa SaúdeAndo con saída dende O Milladoiro. Tamén se realizouse esta mesma andaina o xoves 24 dende o centro de saúde de Bertamiráns.

Por outra banda, o pasado sábado 19 tamén se representou na Casa da Cultura do Milladoiro a obra teatral SOA, que busca concienciar sobre a realidade das mulleres que sofren violencia física e psicolóxica, pero mostrando tamén un futuro repleto de esperanza, autoestima e liberdade sexual.

Para rematar, o día 1 de decembro celebraranse, un ano máis, as xornadas “Achégate á Igualdade”, que se desenvolverán na Casa da Cultura de Bertamiráns, de 9:30 a 14:30 horas. Nesta ocasión asistirán profesionais do ámbito da saúde e expertas en violencia machista, e haberá dúas conferencias e unha mesa redonda. Para asistir é necesario inscribirse enviando un correo ao enderezo electrónico achegate22@gmail.com, no que se indique nome, apelidos e forma de participación (presencial ou por streaming).

Novas relacionadas:

AMS GO!: "Ames celebrou o acto institucional do 25-N no Pazo da Peregrina de Bertamiráns"

El Correo Gallego: "Berro amesán e actividades contra a violencia machista"