A parroquia de San Lourenzo de Agrón celebra este sábado 7 e domingo 8 de outubro as festas na honra de San Andrés e da Virxe do Rosario. As celebracións están organizadas pola Asociación Cultural e a Comisión de festas de San Lourenzo de Agrón, e contan coa colaboración do Concello de Ames, a través da Concellaría de Cultura.

A primeira xornada de festa, o sábado 7, comezará con pasarrúas polas aldeas da parroquia a partir das 9.30 horas a cargo da charanga Os Celtas. Posteriormente, ás 13:00 horas haberá unha misa solemne na honra de San Andrés. A continuación haberá sesión vermú, a cargo da charanga Os Celtas e do grupo Mar de Arousa. Pola noite haberá verbena co grupo Mar de Arousa e a disco móbil Chocolate.

Xa no domingo 8, o día comezará ás 13:00 horas, de novo cunha misa solemne na honra da Virxe do Rosario. Deseguido, e como parte do programa “Música nas parroquias” da Concellaría de Cultura, haberá sesión vermú a cargo da banda municipal de Brión e do Trío Rubí. Tralo xantar, ás 18.00 horas, haberá sesión de tarde a cargo do Trío Rubí.

Servizo de polbeira
Ademais, o domingo 8 contarase con servizo de polbeira no campo da festa. O menú inclúe empanada, polbo, churrasco, pan, postre, viño, refrescos, café e chupitos. O prezo do menú para as persoas adultas é de 35 euros, mentres que os nenos e nenas de 5 a 10 anos pagan 15 euros por menú. As persoas que queiran adquirir os tíckets de xeito anticipado, pódeno facer contactando cos integrantes da comisión de festas.