Trátase do oitavo ano consecutivo no que se pon en marcha esta iniciativa co obxectivo de estimular o uso da lingua galega na actividade económica do concello de Ames, concretamente na actividade empresarial, e para recoñecer publicamente a contribución desde este sector ao aumento e á mellora do uso social do galego. Esta iniciativa está dirixida ás empresas que teñen a súa sede social ou un centro de actividade no concello de Ames. 

Como cada ano, hai dúas categorías de participación: unha destinada ás empresas que realizan un uso estable e continuado da lingua galega desde hai máis de dous anos; e outra enfocada a aquelas  empresas de recente creación (nos últimos dous anos) ou que incorporaron o uso do galego na súa actividade dentro dese mesmo período. Para a primeira categoría, hai un total de 25 empresas inscritas, mentres que na segunda rexistráronse 7. 

Premios e xurado
Para poder seleccionar as empresas gañadoras, o xurado segue unha serie de rigorosos criterios baseados no uso do idioma a nivel interno ou externo, tanto oralmente como escrito. Así é que se valora o uso do galego en todos os ámbitos que teña a empresa (redes sociais, web, sinaléctica, comunicación coa clientela e  co persoal...). Tamén se ten en conta o impacto da actividade empresarial en sectores relevantes para o proceso  de normalización lingüística.

Para a comprobación deses méritos, as empresas candidatas tiveron achegar os enlaces de información web correspondentes ou achegar materiais impresos, ademais de facilitar ao Concello toda a información que se lles requiriu sobre a súa comunicación interna e externa. 

O xurado está formado polo Secretario Xeral da Unión de Consumidores de Galicia (UCGAL), Miguel López Crespo, como representante de consumidores e consumidoras; o presidente da Xuntanza de Empresarios de Ames (XEA), Ramón Cordido Ríos, como representante do asociacionismo empresarial; e Lucía Ferro Diz, graduada en Lingua e Literatura Galega e especialista en Normalización Lingüística. Ademais, a técnica municipal de normalización lingüística, Rosa Moreiras, como secretaria secretaria.

Cunha dotación de 3.000 euros, o certame outorgará 1.500 euros á empresa gañadora de cada unha das categorías. Ademais da parte económica, os gañadores de cada apartado contarán cunha campaña de difusión en Ames Radio, a emisora municipal do Concello.   

Gala de entrega dos premios 
As entidades gañadoras desvelaranse na Gala Lingua e Empresa que se celebrará o vindeiro luns, 15 de decembro, na Casa da Cultura do Milladoiro. O evento contará coa actuación de Leti da Taberna, que coas súas decenas de miles de seguidores nas redes sociais promove e defende o uso da lingua galega desde o humor. Este acto ten como obxectivo darlles difusión a todas as empresas participantes, salientar o activo que supón o uso da lingua galega na actividade empresarial e crear un espazo de encontro e intercambio de experiencias.