Nesa xuntanza volveron achegarse posturas sobre as propostas previamente intercambiadas por ambas partes, e expuxéronse saídas posibles para aqueles puntos nos que subsisten as discrepancias, acadando consenso nas modificacións de partidas correspondentes ás áreas de Mocidade, Servizos Sociais e Turismo. Quedan aínda sobre a mesa cuestións relativas a Medio Ambiente e modificacións no sistema de impostos.

Ambas as partes acordaron intensificar as negociacións co obxectivo de poder acadar un acordo global dentro desta mesma semana, cumprindo así o prazo inicialmente pactado, de xeito que estes orzamentos poidan ser levados a Pleno na primeira quincena de abril.

En palabras de Quique Costas, voceiro do grupo municipal Ames Novo, “en xeral podemos dicir que levamos andado camiño desde o inicio dos contactos na procura duns orzamentos que sexan os mellores posibles para o noso concello e a súa cidadanía. Mesmo así, aínda persisten puntos de discrepancia que estamos traballando conxuntamente para resolver”.

Pola súa parte a concelleira de Economía e Facenda, Genma Otero, manifestou “as negociacións están a facerse nun ambiente de cordialidade e conseguindo o entendemento en moitas das propostas, polo que intensificaremos as xuntanzas para intentar acadar canto antes un acordo polo ben da veciñanza amesá”.

Contido relacionado

El Correo Gallego: "Intensifícanse os contactos en Ames para a aprobación dos orzamentos"
La Voz de Galicia: "El tripartito y AN quieren concluir esta semana la negociación de los presupuestos"