[19-10-2017] Desde este mércores, 19 de outubro, as nenas e nenos do 3º curso de Primaria do CEIP A Maía saben algo máis acerca das normas de seguridade viaria. Esta mañá, Cristina Ferreira, axente do corpo da Policía Local de Ames, ensinou ás nenas e nenos as normas básicas acerca do comportamento que deben seguir cando se desprazan a pé, en bicicleta ou cando son usuarias e usuarios dos medios públicos de transporte. A charla, que tamén será impartida no CEIP de Barouta e no IES do Milladoiro, ten como obxectivo concienciar ás crianzas sobre a importancia de reducir o uso do automóbil, ao tempo que se potencian medios de transporte alternativos como a bicicleta ou o autobús.
A Policía Local de Ames organiza, anualmente, iniciativas educativas que leva aos centros de ensino, tanto públicos como concertados, do concello. O proxecto deste ano xira arredor da seguridade viaria e da redución da contaminación ambiental. Orientado ao terceiro curso tanto de Educación Infantil, como de Primaria e Secundaria, o proxecto, que adopta a forma dunha charla participativa, recalará nos CEIPs da Maía e Barouta e no IES de Ames.
A primeira destas charlas, que tivo lugar esta mañá no CEIP da Maía, foi impartida pola axente da Policía Local de Ames, Cristina Ferreira. Con ela, as crianzas do terceiro curso de primaria aprenderon, a través de diapositivas e vídeos, as normas de seguridade viaria que se deben seguir nos desprazamentos a pé, en bicicleta e en autobús. Do mesmo xeito, con esta charla tamén tiveron a oportunidade de valorar a importancia de ter un aire limpo, libre de contaminación. A actividade gozou dunha boa acollida por parte do alumnado, quen participou de maneira activa, contando as súas propias experiencias e aportando diferentes ideas para mellorar o medio ambiente.
A iniciativa lévase a cabo cando o profesorado o determina máis oportuno, en relación aos contidos que se imparten nese momento nas aulas. O proxecto concíbese, polo tanto, como unha actividade complementaria e transversal aos coñecementos dados polas mestras e mestres na escola. O obxectivo destas charlas é o de facilitar ao alumando información acerca dun uso responsable e seguro dos medios de transporte alternativos, ao tempo que se fomenta a redución do uso do coche e se promove o respecto ao medio ambiente.
