[02-01-2015] O Concello de Ames está a repartir estes días os xoguetes e alimentos recollidos a través das campañas municipais que se desenvolveron ao longo do mes de decembro. Con estas iniciativas, arredor de 150 rapaces disporán de xoguetes o día de Reis e unhas 50 familias -25 de Bertamiráns e 25 do Milladoiro- recibirán un lote de produtos típicos destas datas. Dende a concellaría de Benestar Social destacan o “grande éxito e a alta participación da veciñanza amesá” nestas accións solidarias.
Paralelamente, a área de Servizos Sociais desenvolveu durante o mes de decembro unha campaña de recollida de alimentos de Nadal na que participaron varios centros educativos, como a escola infantil A Madalena do Milladoiro ou o CEIP Agro do Muíño. Con esta acción conseguiron xuntarse 1.525 unidades de alimentos que se repartiron entre 50 familias amesás.
Campaña de recollida de xoguetes
Por outro lado, dende a Oficina de Voluntariado de Ames puxeron en marcha, por duodécimo ano consecutivo, unha Campaña de Recollida de Xoguetes. Baixo o lema En Ames todos xogamos búscase que ningún neno ou nena quede sen agasallo este Nadal. Segundo manifestan dende este departamento municipal “este ano recolléronse o dobre de xoguetes que noutras ocasións”, o que permitirá repartir agasallos o resto de ano. Ademais, cederanse varios lotes de xoguetes a algunha ONG.
Nos últimos días, sete voluntarias estiveron realizando a selección dos xoguetes que se atopan en bo estado e empaquetáronos con papel de agasallo. Tamén se encargaron de ordenalos segundo a idade do neno ou nena ao que vai dirixido cada xoguete. Finalmente, os agasallos acabarán o 6 de xaneiro baixo a árbore de Nadal dun total de 150 rapaces e rapazas.
Contido relacionado
La Voz de Galicia: "Doscientas familias reciben juguetes y alimentos solidarios"
El Correo Gallego: "Doscientas familias se benefician de la recogida de comida y juguetes en Ames"