O Concello de Ames instaurou o 24 de febreiro como o Día de Rosalía. Este xoves, 23 de febreiro, o pleno aprobou por unanimidade unha declaración institucional de recoñecemento do 24 de febreiro como Día de Rosalía no Concello de Ames. A moción ten o obxectivo de impulsar desde o Concello de Ames a proxección do patrimonio literario de Rosalía de Castro cun "singular protagonismo" pola vinculación da escritora con Ames. O acordo compromete ao Concello a promover a difusión do legado da escritora, nomeadamente entre a cidadanía amesá e, con carácter xeral, en Galicia e fóra da comunidade.

Cada 24 de febreiro o Concello de Ames organizará diversas actividades divulgativas. Así, realizarase unha lectura pública da obra rosaliana con especial protagonismo do alumnado e anualmente implicarase aos centros de ensino municipais, asociacións culturais e veciñais na conmemoración das efemérides rosalianas e no coñecemento dos lugares da contorna relacionados coa escritora. Impulsarase ademais a organización de rutas e promoverase a articulación dunha rede informal de concellos rosalianos para o desenvolvemento de iniciativas comúns.

Do mesmo xeito, mellorarase a sinalética vinculada a Rosalía de Castro coa construción dun espazo de referencia que faga visible a vocación rosaliana de Ames. O Concello de Ames avaliará a posibilidade de estar representado a nivel institucional no Padroado da Fundación Rosalía. Neste sentido, o alcalde de Ames, Santiago Amor, anunciou que xa se iniciaron contactos cos responsables da Fundación para establecer futuras liñas de colaboración.  Premendo nos arquivos de audio que están a continuación poderás escoitar os poemas que leron os concelleiros e concelleiras da corporación municipal.