[28-11-2018] O Concello Ames iniciou un plan de cardioprotección coa instalación de 4 desfibriladores que se sumarán ao existente e que tiña Protección Civil. Os dispositivos están situados en instalacións deportivas, como o campo de fútbol do Milladoiro e de Bertamiráns, nos pavillóns polideportivos e Casa de Cultura do Milladoiro. O cuarto desfibrilador estará a disposición da Policía Local, para poder acudir ante unha parada cardíaca de forma móbil. Coa instalación do desfibrilador DOC, o proceso de atención ante unha parada cardíaca axilízase, xa que o propio desfibrilador incorpora un dispositivo conectado 24 horas con telecontrol, tee-asistencia, chamada preferente ao 112 e xeolocalización.

[27-11-2018] Tralo comezo da emisión este luns das pezas participantes no VIII Concurso Radiofónico de Teatro Lido Desata a Lingua!! en Ames Radio, dispoñible na frecuencia modulada 107.2, hoxe comeza a votación das pezas para elixir á gañadora. Un total de vinte e cinco pezas están sendo emitidas entre este luns e o vindeiro 3 de decembro, das 13:30h ás 14:30h e das 22:00h ás 23:00h. A audiencia da radio municipal será a encargada de escoller a obra que obterá o premio do público. A votación poderase realizar ata o vindeiro martes, 4 de decembro, a través do enderezo de correo electrónico radioteatro@concellodeames.gal ou do número de teléfono 981 890 452.

[27-11-2018] O Concello de Ames preparou para o mes de decembro e comezos de xaneiro un amplo abano de actividades que están dirixidas a todos os públicos. A programación comeza este sábado, 1 de decembro, co acto de acendido do alumeado de Nadal. Haberá teatro, obradoiros infantís, eventos e campus deportivos, concertos, foliadas, etc. As actividades péchanse o sábado, 5 de xaneiro, coa Festa de Reis e mailo sábado 12 co Encontro de agrupacións de música e baile tradicional do Concello de Ames. Esta programación tamén recolle o XIII Concurso de Escaparates de Nadal e mailo Concurso de Cartas de Nadal.

[26-11-2018] A concelleira de Promoción Económica, Isabel González, acompañada de técnicos municipais, asistiu o pasado venres, 23 de novembro, ao acto de celebración do décimo aniversario da Asociación Terras de Compostela que se desenvolveu no Hostal dos Reis Católicos, en Santiago de Compostela. Neste acto puidéronse degustar diferentes pratos dos concellos que forman parte deste Grupo de Desenvolvemento Rural (GDR). Por parte do Concello de Ames ofreceuse leite frito, feita con leite ecolóxico do gandeiro da parroquia de Piñeiro, Ramón Senra, que tamén participou en dita celebración.