O Concello de Ames, a través da Concellaría de Educación, informa da publicación no Boletín Oficial da Provincia (BOP) da convocatoria de axudas para a adquisición de material escolar destinado ao alumnado do segundo ciclo de educación infantil (curso 2025-2026). O prazo de presentación de solicitudes está aberto deste o 30 de outubro ata o vindeiro xoves 13 de novembro, 15 días naturais a contar desde o día seguinte ao anuncio de convocatoria no BOP. A contía máxima destinada a esta convocatoria ascende a 6.919,89 euros, sendo de 120 euros o importe máximo concedido por cada nena ou neno.

O vindeiro martes 11 de novembro, a partir das 8.00 horas, estará prohibido estacionar na zona valada do aparcadoiro do supercor, no Milladoiro, con motivo da colocación da árbore de Nadal na localidade.

A Aula da Natureza do Concello de Ames volve con novas actividades para os meses de outono e inverno. Nesta ocasión, organiza a actividade “Cociña de Outono”, composta por tres xornadas, para promover o uso de produtos propios desta época do ano como son a cabaza, as castañas e as laranxas, que serán a base das receitas que se elaboraran nestas tres citas. Este sábado, 8 de novembro, terá lugar unha segunda sesión do obradoiro de biscoito de cabaza, dirixido a nenos e nenas de 6 a 14 anos. Será en horario de 11.00 a 13.30 horas, na instalación que a Aula da Natureza ten na Ameixenda. Estes obradoiros están impartidos por persoal da Escola de pastelería infantil Dolci e Bambini.

No marco das actividades de dinamización do mercado de produtos da horta e artesanía de Ames, este sábado 8 de novembro, organízase un obradoiro de crema hidratante que impartirá Benxamín. Nesta actividade, impartiranse técnicas de cosmética natural para poder aprender a realizar as nosas propias cremas. Dito obradoiro impartirase de 11.30 a 12.30 horas.