Mañá venres 28 de febreiro, o IES do Milladoiro transformarase nun contedor de convivencia positiva e diversidade cultural coa celebración do seu Entroido Intercultural. Esta iniciativa lúdico-educativa ten como obxectivo poñer en valor a riqueza intercultural do centro, onde convive alumnado de 20 nacionalidades diferentes, e fomentar unha convivencia positiva entre toda a comunidade educativa.

Este xoves, día 27, o Concello de Ames celebrará o pleno ordinario correspondente ao mes de febreiro. Na sesión plenaria, a Corporación municipal debaterá sobre a aprobación dos anteproxectos técnicos, tanto do novo complexo deportivo do Milladoiro como para a mellora da piscina municipal A Telleira de Bertamiráns. Tamén se vai abordar o inicio de expediente para a elección de xuíz/a de paz substituto/a; a sétima rectificación do inventario municipal; a resolución de recursos de reposición presentados fronte ao acordo plenario de resolución de alegacións e aprobación definitiva da décimo segunda modificación da RPT; a aprobación inicial da modificación do regulamento do programa Xantar na casa; a aprobación do convenio do proxecto Compostela Rupestre; e o inicio do segundo expediente de resolución do contrato do servizo de axuda no fogar. Ademais abordaranse tres mocións sobre a situación da Escola Infantil Merlín, a celebración do ano Castelao 2025 en Ames; e a mellora da seguridade viaria da AC-544. O pleno será emitido en directo a través da canle de YouTube do Concello de Ames.

Os alcaldes dos Concellos de Ames, Padrón, Dodro, Rianxo, Boiro, A Pobra e Ribeira asinaron esta mañá no Pazo da Peregrina, en Bertamiráns, un manifesto reclamando a constitución dunha mesa de traballo entre o Ministerio de Transportes e Mobilidade Sostenible e os Concellos afectados directamente polas tarifas da AP-9, que teña como obxectivo final a gratuidade da mesma. Paralelamente, solicítanlle ao Ministerio que realice un estudo e determine un calendario para unha liberalización en fases da AP-9; e que se analice a posibilidade de ampliar a zona libre de peaxes da área de Santiago ata Padrón, facilitando o enlace gratuíto da AP-9 e a AG-11.

A Casa da Cultura de Bertamiráns acolleu onte, 24 de febreiro,  unha gran festa rosaliana, o evento central das actividades organizadas polo concello para conmemorar o mes da autora. A Gala Rosalía, que contou cunha gran participación da veciñanza e do alumnado dos centros educativos de Ames, puxo en valor a figura da escritora e a súa vinculación co concello. Canda a veciñanza de Ames, na gala participaron Anxo Angueira, presidente da Fundación Rosalía, e María López Sández, membro tamén da dita fundación.  O acto  pechouse cun concerto de Uxía Senlle e Santi Cribeiro que remataron cantando o tema “No bico un cantar” con boa parte do alumnado presente con eles no escenario. Pódese acceder á galería completa de imaxes na seguinte ligazón.