Ames conmemora o Día Mundial do Teatro coa publicación dun vídeo que protagonizan os rapaces e rapazas que integran a Escola Municipal de Teatro. A través deste vídeo, no que se conta a historia dunha misteriosa maleta, queren compartir a súa paixón pola escena e desexarlle a toda a veciñanza un día cheo de arte, emoción e moita maxia teatral. Actualmente estase desenvolvendo a programación cultural do primeiro semestre de 2025, que inclúe trece espectáculos de teatro, danza e circo e que se representan de xaneiro a maio.

A Asociación Veciñal de Bugallido, en colaboración co Centro Cultural Mahía e a Sociedade Agraria de Bugallido, Ortoño e Biduído, organiza a segunda edición do seu ciclo de xornadas sobre saúde «Abril, mes da saúde en Bugallido». O programa consta de catro xornadas nas que se achegarán diferentes temas e aspectos relacionados co ámbito da saúde á veciñanza. A primeira destas xornadas celebrarase mañá xoves, día 27, coa realización dun obradoiro de primeiros auxilios. Este obradoiro dá dereito a certificación e, ademais, require de inscrición previa, que se pode realizar na seguinte ligazón.

Este xoves, día 27, o Concello de Ames celebrará o pleno ordinario correspondente ao mes de marzo. Na sesión plenaria, a Corporación municipal debaterá sobre a aprobación do crédito extraordinario 1/2025 financiado con baixas por anulacións; a derrogación da ordenanza municipal reguladora da prestación de alimentos; a modificación da base número 50 do orzamento municipal de 2024, prorrogado para 2025, sobre as subvencións nominativas para o exercicio 2025; a modificación do expediente de gasto do convenio de colaboración entre a Consellería de Infraestruturas e Mobilidade, o Concello de Ames e a UTE “XG-807”, para a implantación dun servizo de interese municipal (SIMU); a extensión da vixencia para o período 2025-2029 do plan de continuidade da protección contra incendios forestais mediante a plantación de frondosas; a aprobación inicial da quinta modificación puntual do regulamento orgánico municipal; e a proposta de resolución de alegacións e remisión ao Consello Consultivo de Galicia do segundo expediente de resolución do contrato do servizo de axuda no fogar. Ademais abordarase unha moción, presentada polo grupo municipal popular de Ames, con motivo do día internacional das mulleres, 8 de marzo. O pleno será emitido en directo a través da canle de YouTube do Concello de Ames.

Tres deportistas do club amesán TKDenodo, David Noya Platas, Breixo Lestón Cives e Jorge Nogueiras Rivero, participaron no campionato de España (categorías cadete e júnior) como parte da selección galega de taekwondo. Dito campionato celebrouse os días 15 e 16 de marzo en Tarragona. Os tres deportistas tiveron unha participación destacada. Breixo Lestón e David Noya acadaron o quinto posto, quedando a un paso de acadar medalla. Ademais, estes tres taekwondistas foron convocados pola selección galega para participar no Open de España os días 25 e 26 de abril.