O sábado, 14 de xuño, ás 20.30 horas, no auditorio da Casa da Cultura de Bertamiráns o grupo A Pedreira presenta “Basal”, unha obra que conecta música, psicoloxía, territorio e corpo-casa. Este grupo está liderado pola artista galega Ugía Pedreira, unha das grandes voces da música tradicional. O seu repertorio abarca folk, rock e jazz, nunha paleta rítmica amplísima tanto de instrumentos orgánicos como electrónicos. Os convites para dito concerto poden adquirirse na Billeteira electrónica do Concello de Ames.

As pistas de tenis de Aldea Nova acollerán, a partir do vindeiro 21 de xuño, a terceira edición Aberto de San Xoán, un torneo de tenis organizado polo club de tenis Val da Maía en colaboración co departamento de Deportes do Concello de Ames. As persoas interesadas en participar poden inscribirse ata o 14 de xuño ás 22.00 horas para as categorías de menores (alevín, infantil, cadete e junior), mentres que a data límite para as categorías de adultos (absoluto, veteranas+35 e veteranos+45) é ata o 21 de xuño, tamén ás 22.00 horas. A cota de inscrición é de 15 euros para as categorías de menores. No caso do resto de categorías, a contía de inscrición é de 18 euros. 

O Concello de Ames, a través da Concellaría de Planificación e Xestión Educativa, volve a darlle a oportunidade aos nenos e nenas, que son usuarios/as da Rede municipal de comedores escolares, de votar polo menú de fin de curso que se servirá o vindeiro xoves 19 de xuño. O primeiro prato elíxeo a técnica municipal en nutrición, mentres que o alumnado ten que votar para elixir o segundo prato e maila sobremesa. As eleccións desenvolvéronse durante o horario no que se emprega o servizo de comedores no CEIP Agro do Muíño, CEIP A Maía, CEP de Ventín, CEIP de Barouta, EEI do Milladoiro e nas escolas unitarias de Covas e Ortoño. O servizo de comedores escolares conta con1.469 usuarios/as.

O auditorio da Casa da Cultura do Milladoiro acolleu unha xornada aberta sobre o presente e futuro das comunidades enerxéticas. Abriron a xornada a subdelegada do Goberno na provincia da Coruña, María Rivas, o alcalde de Ames, Blas García, e o concelleiro de Xestión do Medio Natural, Javier Antelo, que destacaron a importancia das administracións públicas no asesoramento para creación de comunidades enerxéticas e os beneficios que ditas entidades poden xerar para a veciñanza. Ao longo da mañá houbo diferentes mesas de debate nas que se afondou sobre a afectación xurídica das comunidades enerxéticas; a transición enerxética e o funcionamento da OTC de Ames; e os distintos programas de actuacións, financiamentos, achegas e demais axudas para a creación de comunidades enerxéticas. Premendo nesta ligazón poder coñecer os proxectos da Comunidade Enerxética “CE Ames Solar”.