O Concello de Ames informa que este sábado, 23 de maio de 2020, publicouse no Boletín Oficial do Estado a Orde SND/414/2020, de 16 de maio, para a flexibilización de determinadas restricións de ámbito nacional establecidas trala declaración do estado de alarma en aplicación da fase 2 do Plan para a transición cara unha nova normalidade. Cómpre lembrar que o concello de Ames, ao igual que o resto de concellos galegos, entra este luns, 25 de maio de 2020, na fase 2, polo que se establecen novas condicións no proceso de desescalada. Dende o Concello de Ames apélase á responsabilidade dos veciños e veciñas no cumprimento das normas polo ben común e evitar así un posible retroceso no control da pandemia.

Este mércores, 20 de maio de 2020, o Goberno do Estado publicou a Orde SND/422/2020, do 19 de maio, pola que se regulan as condicións para o uso obrigatorio de máscara durante a situación de crise sanitaria ocasionada pola COVID-19. A partir de mañá, 21 de maio de 2020, será obrigatorio uso de calquera tipo de máscara, preferentemente hixiénicas e cirúrxicas, para todas as persoas de seis anos en diante, que cubra nariz e boca, observándose en todo caso, as indicacións das autoridades sanitarias acerca do seu uso. Quedan excluídas desta obrigación aquelas persoas que presenten algún tipo de dificultade respiratoria, que poida verse agravada pola utilización da máscara, e a aquelas cuxo uso se atope contraindicado por motivos de saúde ou discapacidade. Recoméndase o uso nos/as nenos/as de 3 a 5 anos.

Despois da publicación no Boletín Oficial do Estado (BOE) o pasado domingo, 3 de maio, das diferentes ordes que regulan a fase 0 do proceso de desescalada, o Concello de Ames procedeu durante o luns e o martes ao reparto de 3.000 novas máscaras entre a veciñanza amesá. No operativo participaron a Garda Civil do Milladoiro, que coordinou o reparto, a Policía Local e maila Agrupación de Protección Civil de Ames. Repartíronse 2.500 máscaras cedidas polo Goberno central, a través da Subdelegación do Goberno en Galicia, e o Concello aportou ademais, entre os comercios e establecementos, 500 máscaras e 200 pantallas de protección.

O Ministerio de Transportes, Mobilidade e Axenda Urbana (antigo Ministerio de Fomento), a petición do Concello de Ames ante a Subdelegación do Goberno, realizará este xoves, 7 de maio, traballos de desinfección viaria nas localidades de Bertamiráns e do Milladoiro. Un camión aplicará hipoclorito de sodio nas rúas do Milladoiro e Bertamiráns, en horario de 21.00 a 23.00 horas. Debido a iso, neste horario, recoméndase non estacionar vehículos nas marxes das rúas destes núcleos urbanos e deixalos nos garaxes ou nas zonas habilitadas para o aparcamento colectivo, para que non sexan salpicados con dito líquido desinfectante.