O Concello de Ames e a entidade Xesta Natureza presentaron esta mañá a segunda edición da carreira de orientación do Concello de Ames, que se desenvolverá na área deportiva de Bertamiráns este sábado, 15 de abril. A iniciativa volve a ser posta en marcha polo departamento de Deportes tralo éxito acadado o pasado ano. Para esta segunda proba hai xa 175 persoas inscritas, e todos/as os/as que desexen anotarse poderán facelo ata as 23:59 horas do día de hoxe, premendo nesta ligazón. No acto de presentación participaron o alcalde de Ames, Blas García; a concelleira de Deportes, Susana Señorís; o técnico de dito departamento, Alberto Viaño; e Ricardo Figueroa, en representación de Xesta Natureza.

Onte domingo 2 de abril celebrouse a cuarta edición do Trail e Andaina Ribeiras do Tambre, unha proba na que se inscribiron 341 persoas. A primeira en cruzar a meta na categoría absoluta feminina foi Bea Barroso, do Club Atletismo Noia, cun tempo de 1:30:00, mentres que o primeiro posto masculino foi para Manuel Piñeiro, do Club Atletismo Cambados Seguros Noval, que obtivo unha marca de 1:11:42. Pola súa banda, o club gañador foi o C.A. Cambados – Seguros Noval, que colocou seis corredores no top 30 e que repite a vitoria de 2022. Consulta os resultados ao completo premendo nesta ligazón.

O Club de ciclismo amesán Os Esfola Arrós e a empresa Team Relay, coa colaboración do Concello de Ames, organizaron este domingo, 12 de marzo, a segunda proba do circuíto Transgalaica 2023. Foi a sétima ocasión na que o concello acolleu esta cita, unha das máis importantes do ciclismo no noroeste español. Dende 2016 organízase esta proba do circuíto Transgalaica en Ames. En 2021 non se puido realizar debido a situación epidemiolóxica derivada da Covid-19. Nesta edición inscribíronse 296 ciclistas que tiñan que percorrer unha distancia de 64,31 quilómetros. Finalizaron a proba 232 ciclistas e houbo 38 abandonos. Ademais, 26 dos ciclistas inscritos non se presentaron. Preme nesta ligazón para ver a galería de fotos da Transgalaica.

O Concello de Ames e a Federación Galega de Atletismo organizan a IV edición do “Trail e Andaina Ribeiras do Tambre”, que se desenvolverá o vindeiro domingo 2 de abril. A saída do trail terá lugar ás 10:00 horas dende Ponte Maceira. Cinco minutos máis tarde, e desde o mesmo lugar, sairá a andaina. Para participar é necesario inscribirse a través de emesports.es. O prazo remata o 29 de marzo ás 23:59 horas. A proba enmárcase dentro da especialidade atlética do trail-running e estará baixo o control técnico do Comité Galego de Xuíces da Federación Galega de Atletismo. Poderá participar calquera deportista, estea ou non federado. Os inscritos e inscritas correrán cunha licenza de día de trail-running, que incluirá un seguro de accidentes deportivos e de responsabilidade civil.