Esta mañá presentouse no paseo fluvial de Bertamiráns a terceira edición da carreira de orientación do Concello de Ames, que terá lugar no casco urbano de Bertamiráns o vindeiro domingo, 5 de maio, a partir das 11:00 horas. Esta actividade foi organizada polo departamento de Deportes en colaboración coa entidade Xesta Natureza. Xa hai máis de 100 persoas inscritas, e todos/as os/as que desexen anotarse poderán facelo ata as 23:59 horas do mércores 1 de maio premendo nesta ligazón.

A trixésimo oitava edición do Rally Berberecho de Noia tivo un treito que se disputou de forma íntegra por estradas do concello de Ames. Os pilotos fixeron unha dobre pasada polo tramo de Ames. A primeira pasada comezou arredor das 16.50 e a segunda ás 19.40 horas, sendo o último tramo do rally. Ademais, o parque de reagrupamento estivo situado na avenida José Luís Azcárraga, diante do Pazo da Peregrina, en Bertamiráns, de 17:15 a 19:30 horas. Un gran número de afeccionados puideron gozar desta proba automobilística que puntúa para o campionato galego de rallys.

O club de Taekwondo TKDenodo organiza, coa colaboración do Concello de Ames e por delegación da Federación Galega de Taekwondo e a Secretaría Xeral para o Deporte da Xunta de Galicia, o campionato provincial en idade escolar das modalidades técnica e freestyle de Taekwondo. O torneo terá lugar o sábado, 13 de abril, no polideportivo do Milladoiro a partir das 9.00 horas. Participan rapaces e rapazas de 6 a 16 anos do programa Xogade. Esta proba clasificará para o campionato galego, que terá lugar o vindeiro sábado, 27 de abril, en Vigo.

A localidade do Milladoiro acolle este domingo, 24 de marzo, a primeira edición do Trofeo de Marcha Atlética en ruta, que puntúa para o Circuíto Galego de Marcha Atlética 2024. Para participar nesta proba deportiva inscribíronse un total de 108 atletas dos cales 107 están admitidos/as. Poden participar atletas con licenza en vigor pola Federación Galega de Atletismo. Na inscrición son válidas as marcas realizadas nas tempadas 2023 e 2024. Haberá seis probas distintas tendo en conta a categoría dos/as participantes (sub 12 masculina; sub 12 feminina; sub 10; sub 14; sub 16; e absoluta). Premendo nesta ligazón podes acceder ao regulamento da proba.