A Xunta de Goberno Local do Concello de Ames aprobou o pasado 1 de xuño de 2023 as bases das convocatorias de axudas para as actividades realizadas polas ANPAS dos centros educativos amesáns ao longo dos exercicios 2022 e 2023. A contía máxima destas axudas ascende a 20.000 euros por exercicio. As solicitudes para participar nesta convocatoria poderán presentarse dende o 28 de xuño ata o 27 de xullo. A través destas axudas poderase sufragar ata o 100% do orzamento total asignado a cada centro escolar para viaxes culturais, actividades extraescolares, organización de encontros e xornadas, mobiliario e material didáctico; así como actividades que fomenten a conciliación da vida laboral e familiar durante as xornadas lectivas. Premendo nas ligazóns que están ao pé desta nova pódense consultar as bases para solicitar estas axudas. 

A Xunta de Goberno Local do Concello de Ames vén de aprobar a convocatoria de subvencións para a promoción de festas populares e actividades levadas a cabo polas asociacións culturais no exercicio 2023. O prazo para solicitar estas axudas, que suman unhas contías de 30.000 euros para as actividades culturais e de 25.000 euros para as festas, xa está aberto ata o 12 de xuño. Premendo nestas ligazóns pódese obter máis información sobre a convocatoria para as festas populares, ou ben para as actividades culturais. 

A Xunta de Goberno Local vén de aprobar, o pasado xoves, 22 de decembro, a concesión de axudas relativas á promoción do comercio local do exercicio 2022. O obxectivo destas subvencións é a de favorecer a promoción e o desenvolvemento de actividades realizadas no seo das asociacións de comerciantes e profesionais do Concello de Ames, que estean legalmente constituídas e inscritas no rexistro municipal. Deste xeito, concédense tanto axudas para a promoción comercial como para infraestruturas. As asociacións beneficiarias son a Xuntanza de Empresarios de Ames (XEA), a Asociación de Empresarios do Parque Empresarial do Milladoiro e a Asociación de pequenos comerciantes Viorneira, Palmira Boulevar, entre as que se repartirán un total de 40.000 euros.

O Concello de Ames acaba de aprobar, en Xunta de Goberno Local, a concesión das axudas relativas á promoción das actividades culturais e á organización de festexos tradicionais. Despois de resolver as solicitudes presentadas, o Goberno municipal aprobou o reparto de 30.000 euros entre dez asociacións culturais e de 25.000 euros entre sete asociacións e comisións de festas. A estas subvencións puideron optar todas as asociacións do concello que realizan actividades de índole cultural e festas tradicionais. Todas aquelas entidades que aínda non presentaran a xustificación de gastos terán ata o día 31 de xaneiro de 2023 para facelo.