A Xunta de Goberno Local aprobou o pasado 1 de decembro a concesión de axudas para as familias numerosas do Concello de Ames. Así, aprobouse a concesión de 70.800 euros entre 59 familias. A axuda consiste nun pagamento único de 1.200 euros por unidade de convivencia. A ela puideron optar as familias numerosas que teñen a súa residencia habitual en Ames, de maneira ininterrompida desde hai polo menos un ano.

A Xunta de Goberno Local aprobou a concesión de axudas para a promoción de actividades levadas a cabo por clubs e asociacións deportivas de Ames no exercicio 2022. O importe das subvencións ascende a 78.809,34 euros. Un total de 20 entidades beneficiaranse da axuda, que busca achegar a práctica deportiva ao maior número de veciños/as posible, así como promover unha vida deportiva estable dentro do concello.

O Concello de Ames acaba de aprobar, en Xunta de Goberno Local, a concesión de axudas relativas á promoción de actividades das asociacións culturais locais. Despois de resolver as solicitudes presentadas, o goberno municipal aprobou o reparto de 30.000 euros entre un total de once asociacións. A estas subvencións puideron optar todas as entidades culturais ou veciñais do concello de Ames que realizan actividades de índole cultural. O prazo de xustificación de gastos comprende ata o día 31 de xaneiro de 2024.

O Concello de Ames, a través da Concellaría de Benestar Social, informa de que este xoves, 20 de xullo, saíu publicada, no Boletín Oficial da Provincia (BOP), a convocatoria de axudas destinadas ao apoio económico das familias numerosas do municipio. A contía total destinada a estas axudas é de 100.000 euros, sendo de 1.200 euros o máximo do importe individual concedido a cada unidade de convivencia. Con esta iniciativa, o goberno municipal pretende axudar a aquelas familias que máis dificultades económicas teñan para a crianza das súas fillas e fillos. As persoas interesadas poderán presentar as solicitudes no Rexistro telemático a través da sede electrónica do Concello de Ames ou de xeito presencial nas oficinas de asistencia en materia de rexistro situadas na Casa do Concello e na oficina municipal do Milladoiro. O prazo para presentar as solicitudes vai do 21 de xullo ao 20 de agosto de 2023. Premendo nesta ligazón podes obter máis información sobre esta convocatoria.