O Concello de Ames acaba de aprobar, na Xunta de Goberno Local do pasado 5 de xullo, a concesión das axudas relativas á promoción das actividades culturais e á organización de festexos tradicionais. Despois de resolver as solicitudes presentadas, o Goberno municipal aprobou o reparto de 30.000 euros entre catorce asociacións culturais e de 25.000 euros entre oito asociacións e comisións de festas. A estas subvencións puideron optar todas as asociacións do concello que realizan actividades de índole cultural e festas tradicionais. As entidades beneficiarias destas axudas teñen ata o 31 de xaneiro de 2025 para presentar a xustificación de gastos. Os gastos a aportar polas entidades beneficiarias teñen que corresponder ao exercicio 2024.

O Concello de Ames, a través da Concellaría de Benestar Social, informa de que este mércores, 12 de xuño, saíu publicada no Boletín Oficial da Provincia (BOP) a convocatoria de axudas destinadas ao apoio económico das familias numerosas do municipio. A contía total destinada a estas axudas é de 100.000 euros, sendo de 1.200 euros o máximo do importe individual concedido a cada unidade de convivencia. Con esta iniciativa, o goberno municipal pretende axudar a aquelas familias que máis dificultades económicas teñan para a crianza das súas fillas e fillos. Este ano, como novidade, tamén se comprobará o patrimonio e será preciso presentar a declaración do IRPF do exercicio 2023. As persoas interesadas poderán presentar as solicitudes no Rexistro telemático a través da sede electrónica do Concello de Ames ou de xeito presencial nas oficinas de asistencia en materia de rexistro situadas na Casa do Concello e na oficina municipal do Milladoiro. O prazo para presentar as solicitudes vai do 13 de xuño ao 15 de xullo de 2024. Premendo nesta ligazón podes obter máis información sobre esta convocatoria.

O Concello de Ames, a través da Concellería de Cultura, vén de aprobar por primeira vez a convocatoria de subvencións en especies para as festas populares celebradas no 2024 por asociación e comisións de festas municipais. Con estas axudas búscase fomentar a celebración das Festas e colaborar na súa organización, facendo mais doada a labor que está a desenvolver o tecido asociativo e as comisións de festas do concello no eido da dinamización sociocultural. A contía total desta liña de axudas ascende a 24.000 euros. Premendo nesta ligazón pódense obter as bases da convocatoria.

O Concello de Ames informa sobre a convocatoria de axudas para a promoción de actividades levadas a cabo no exercicio 2023 polos clubs e asociacións deportivas de Ames. A contía destinada a esta convocatoria ascende nesta anualidade aos 80.000 euros. O prazo de presentación de solicitudes é de 30 días naturais desde a publicación das bases no Boletín Oficial da Provincia (BOP), que tivo lugar o pasado 4 de maio; polo que remata o 3 de xuño. Ao pé desta nova podes atopar as bases e os impresos de solicitude.