A Concellaría de Mocidade organiza unha xornada de deporte e cultura urbana no parque de Lapido, en Bertamiráns, aproveitando as recentes melloras realizadas no recinto grazas aos orzamentos participativos de Mocidade e ao investimento da Concellaría de Deportes. Habilitaranse diferentes módulos para realizar skate e parkour, e practicarase slackline e calistenia no seu circuíto de exercicios do parque, inaugurado en xuño de 2020 xunto a outro similar no Milladoiro. As actividades terán lugar o mércores 22 de decembro, o primeiro día de vacacións de Nadal para a mocidade, das 15:00 ás 19:00 horas. A entrada será libre ata completar aforos.

A Casa da Cultura de Bertamiráns acolle este xoves 16 de decembro, ás 20:00 horas, a gala de entrega de premios do certame Galetiktokers, unha iniciativa da Concellaría de Mocidade e Normalización Lingüística que volve por segundo ano para fomentar a creatividade da xente moza e a creación de novos formatos en galego. O evento será conducido polas influencers e presentadoras Fátima Pego e Lucía Rodríguez, e contará coa intervención das integrantes do xurado, Gabi G e Leti da Taberna, así como coa música de DJ Son1c e da propia Fátima Pego. Os convites, de balde, xa se poden retirar na billeteira electrónica do Concello de Ames.

Dende este martes 23 ata o 30 de novembro ás 23:59 horas, o público poderá escoller ás persoas gañadoras dos dous premios do público de 150 euros que se reparten nesta segunda edición de Galetiktokers. Para votar, cómpre seguir ao perfil de Instagram da OMIX de Ames (@omixames) e premer “gústame” nos 21 tiktoks candidatos, que se subirán a esa mesma conta. Os vídeos con máis “gústame” das dúas categorías de idade (dos 13 aos 16 anos e dos 17 en diante) levarán os galardóns do público. A entrega de premios terá lugar o 16 de decembro, na Casa da Cultura de Bertamiráns.

Gravar un vídeo onde teña presenza o galego e subilo a Tik Tok este é o único que ten que facer a rapazada para participar no Galetiktokers. Son dous sinxelos pasos para acadar os obxectivos da segunda edición do certame que van dende estimular a creatividade entre a mocidade, animar a creación de vídeos en galego con novos formatos e temáticas ata darlle visibilidade á crecente comunidade galega na rede social TikTok. Nesta edición poderá participar rapazada a partir dos 13 anos de calquera parte do mundo, enviando o seu vídeo e esta ficha de participación ao enderezo electrónico galetiktokers21@gmail.com. Entre os participantes repartiranse catro premios de 150 euros nunha gala que se celebrará o 16 de decembro, na Casa da Cultura de Bertamiráns.