Desde hoxe está aberto o prazo de inscrición para o curso de Introdución á lingua e literatura galegas que convoca o Concello de Ames en colaboración coa Xunta de Galicia, dirixido a persoas procedentes doutras comunidades lingüísticas co obxectivo de impulsar o uso do galego e aproximar a veciñanza ao noso idioma, así como favorecer a cohesión e a integración social. Este curso de 20 horas impartirase no Pazo da Peregrina do 15 ao 30 de outubro de luns a xoves, con sesións de dúas horas e en horario de tarde, das 16:00h ás 18:00h. As inscricións, de balde, poden realizarse de xeito presencial acudindo ao Servizo de Normalización Lingüística, situado no Pazo da Peregrina de Bertamiráns, chamando por teléfono ao número 662 377 215 ou a través do enderezo electrónico normalizacion@concellodeames.gal.

A Carballeira de Ventín acolleu este pasado martes, 30 de setembro, unha nova xornada das Brincadeiras Miúdas, nas que os nenos e nenas xunto coas súas familias, puideron gozar de música, baile, xogos tradicionais e creación de xoguetes. Esta edición das Brincadeiras Miúdas xuntou a máis de 200 persoas, que gozaron nun concerto de Cé Orquestra Pantasma e participaron en xogos tradicionais, xogo libre e desestruturado e un espazo para a creación libre de xoguetes con materiais naturais.

O pasado luns, 15 de setembro, comezou o Obradoiro de acollemento lingüístico “En galego, co teu acento”, que se desenvolve na localidade de Bertamiráns ata o vindeiro 8 de outubro. Nesta ocasión, participan catorce persoas de diferentes lugares co obxectivo de achegarse á cultura e lingua galega. Esta iniciativa, na que colaboran as concellarías de Normalización Lingüística e de Benestar Social, tamén se realizará no Milladoiro do 13 de outubro ata o 5 de novembro. A inscrición para participar na quenda do Milladoiro segue aberta e aínda quedan prazas libres. Pódese facer de xeito presencial acudindo ao Servizo de Normalización Lingüística, situado no Pazo da Peregrina de Bertamiráns, ou á oficina do Servizo de Atención ás Persoas Migrantes (SAMI), situada na rúa de Abaixo, número 10, do Milladoiro. Tamén poderá formalizarse a inscrición chamando por teléfono aos números 662 377 215 / 981 535 941. 

A Real Academia Galega e Alingua celebran esta mañá en Rois un encontro para coñecer polo miúdo o proxecto de promoción do idioma na infancia Modo galego, actívao! de cara á súa posible implantación en concellos que conforman esta asociación de entidades locais pola normalización lingüística. Os municipios coñecerán os detalles do programa de investigación e acción que o Concello de Ames e a Real Academia Galega desenvolven dende 2021. A proposta é singular tanto pola variedade e o número de axentes implicados, xa que inclúe propostas para máis de 2.500 alumnos e alumnas dos centros públicos amesáns, as súas familias, o profesorado e o persoal dos servizos complementarios de educación; coma por combinar a posta en práctica de accións para a dinamización da lingua coa súa posterior avaliación por parte da RAG.