Actualidad
Lunes, 12 de diciembre de 2022
O salón de plenos da Casa do Concello de Ames acolleu esta mañá a presentación do concurso de fotografía “Ilumina o teu sorriso”, organizado pola Xuntanza de Empresarios de Ames (XEA) en colaboración coa Concellaría de Promoción Económica, o centro dental Macía e o estudo de deseño gráfico e imaxe de marca La Rayuela. O certame ten como obxectivo dinamizar os establecementos locais, fomentando o achegamento da cidadanía ás rúas más comerciais. Para participar na campaña cómpre realizar dúas fotografías en dous dos lugares seleccionados polas súas decoracións de Nadal: nas prazas do Concello e da Maía, en Bertamiráns, ou na praza da Madalena e no aparcamento do Supercor, no Milladoiro. Os premios son un teléfono móbil Samsung Galaxy A13 e dous vales de 100 euros cada un para gastar en comercios amesáns. As bases ao completo poden consultarse premendo nesta ligazón.
Lunes, 12 de diciembre de 2022
O tradicional acto de acendido das luces abriu oficialmente o tempo de Nadal en Ames na tarde do sábado, 10 de decembro. Dende ese momento, as luminarias engalanan os principais edificios municipais e iluminan as rúas e as prazas do Milladoiro, de Bertamiráns e das parroquias amesás. Persoal da Policía Local e da agrupación de Protección Civil de Ames foron os encargados de premer o botón de acendido das luces. O acto, que se celebrou na Casa do Concello de Bertamiráns, contou coa actuación musical do alumnado da Escola Municipal de Música de Ames e cunha chocolatada con churros gratuíta. A programación de Nadal ao completo pode consultarse premendo nesta ligazón.
Viernes, 09 de diciembre de 2022
Este sábado, 10 de decembro, ás 18.00 horas, na praza do Concello, está previsto que se celebre o acto de acendido das luces de Nadal. Actuará a Escola Municipal de Música de Ames e haberá unha degustación gratuíta de chocolate con churros. Este ano non se vai desvelar ata o momento de acender as luces a persoa que premerá o botón de acendido. Este ano vaise a reducir o horario de acendido do alumeado de Nadal. Estará acendido en horario de 18.00 a 00.00 horas dende este sábado, 10 de decembro, ata o día 6 de xaneiro (incluído). A programación de Nadal ao completo pode consultarse premendo nesta ligazón.
Viernes, 09 de diciembre de 2022
O espazo de coworking A Proa, no Milladoiro, organiza o próximo mércores, 14 de decembro, un novo evento. Desta volta trátase dun taller sobre a xestión do estrés no emprendemento, que será impartido por Eva Villar. Terá lugar ás 12:00 horas no local do centro A Proa. A entrada é de balde, e os interesados en asistir poden inscribirse premendo nesta ligazón.
Miércoles, 07 de diciembre de 2022
O salón de plenos da Casa do Concello acolleu esta mañá a presentación de programación que se desenvolverá en Ames durante as festas do Nadal. O programa, organizado de maneira conxunta por diversos departamentos municipais, busca sacar o Nadal ás rúas e dinamizar o comercio e a hostalaría local. Ao acto asistiron o alcalde de Ames, Blas García; a concelleira de Promoción Económica, Ana Belén Paz; o concelleiro de Medio Ambiente, Manuel Lens; a concelleira de Cultura, Natividade González; e mailo presidente de XEA, Jorge López. As actividades inclúen obradoiros, concertos, espectáculos e as visitas de Papá Noel e os Reis Magos. A programación ao completo pode consultarse premendo nesta ligazón.
Miércoles, 07 de diciembre de 2022
Ata o día 13 de xaneiro está aberto o prazo para solicitar praza no novo programa integrado de emprego dos Concellos de Ames e Brión (2022-2023). O programa nesta edición está aberto a 100 persoas desempregadas, que se formarán nos ámbitos do comercio; almacén; ocio e tempo libre; limpeza de edificios e locais e arranxo de habitacións en hoteis; turismo; idiomas e novas tecnoloxías. O obxectivo do programa é que, como mínimo, o 40% das persoas participantes atopen un traballo, porcentaxe superada nas últimas edicións executadas dos programas integrados.
Viernes, 02 de diciembre de 2022
O Concello de Ames e Maker Faire Galicia organizan unha nova edición de Innovames, unha xornada de innovación para as empresas de Ames que terá lugar o 16 de decembro no pavillón polideportivo do Milladoiro e na que se contará coa presenza de grandes referentes da innovación que conviven no propio concello. O obxectivo deste evento é poñer en valor os recursos e a capacidade de innovación local, fomentando a sinerxía e a colaboración entre as empresas e dando a coñecer ao público xeral o capital empresarial de Ames. Para dispor de máis información sobre o InnovAmes pódese consultar a páxina web do evento.
Jueves, 01 de diciembre de 2022
O Concello de Ames, a través da Concellaría de Promoción Económica, puxo en marcha un ano máis o concurso de escaparates de Nadal, que ten como obxectivo invitar aos comercios a colaborar na decoración do concello durante estas datas. Por primeira vez, ademais, organízase o certame de decoración de Nadal veciñal, que premiará as mellores decoracións colocadas nas vivendas e edificios de Ames. O prazo para anotarse en ambos concursos xa está aberto e rematará o 5 de decembro, no caso do certame de escaparates, e o 10 de decembro, no de decoración veciñal. A solicitude de inscrición débese presentar acudindo aos rexistros municipais ou a través da Sede electrónica do Concello. As bases poden consultarse nos anexos ao pé desta nova.
Lunes, 28 de noviembre de 2022
O espazo coworking A Proa organiza esta semana unha nova actividade. Este xoves 1 de decembro terá lugar un encontro de networking no que se reunirán profesionais do mundo dixital e tecnolóxico. En dito encontro reuniranse desarrolladores, deseñadores, marketers dixitais, editores e programadores. Todos eles/elas compartirán coñecemento e experiencia sobre o sector. Este evento tamén servirá para coñecer a outros profesionais na zona. A inscrición para participar neste encontro dixital é de balde e pódese facer premendo nesta ligazón. O evento está organizado por Luján Kubrusli e Isabel Viñas.
Sábado, 26 de noviembre de 2022
O programa integrado de emprego dos concellos de Ames e Brión, subvencionado pola Consellería de Emprego e Igualdade con 243.316,35 euros, vén de rematar a edición 2021/2022 con resultados moi satisfactorios en todos os ámbitos do programa. O pasado día 21 de novembro rematou dito programa, no que máis do 60% das persoas participantes tivo algún contrato laboral. Nesta edición, participaron 100 persoas desempregadas (60 mulleres desempregadas dos concellos de Ames e Brión e 40 persoas menores de 30 anos desempregadas e cunha cualificación máxima de Bacharelato), que se formaron nos ámbitos de comercio, almacén, ocio infantil e tempo libre, limpeza e arranxo de habitacións en hoteis, turismo e TICs.
- ‹ anterior
- 17 de 49
- siguiente ›