O Roteiro Maker, unha furgoneta que organiza obradoiros itinerantes gratuítos relacionados coa ciencia e a tecnoloxía, visitará os colexios de Agro do Muíño, A Maía, Barouta e Ventín entre os días 20, 21, 22 e 23 de febreiro para conmemorar o Día da Muller e a Nena na Ciencia. O salón de Plenos da Casa do Concello acolleu esta mañá a presentación desta iniciativa coa que o Concello de Ames busca dar a coñecer a figura das mulleres en diversas áreas científicas. A empresa Mirabelle Comunicación Audiovisual elaborará un vídeo sobre esta iniciativa que servirá para difundir o Roteiro Maker na Red Innpulso.

A Casa do Concello acolleu este xoves, 8 de febreiro, o acto de entrega de premios ás gañadoras e gañadores do XVIII concurso de escaparates de Nadal e do II concurso de decoración de Nadal veciñal. O alcalde de Ames, Blas García, a concelleira de Promoción Económica, Ana Belén Paz, e o técnico do departamento de Promoción Económica, Jorge Couñago , foron os encargados de repartir os galardóns, que consistiron nuns trofeos e diplomas. En total repartíronse 6.000 euros entre os gañadores/as. No concurso de escaparates repartíronse catro premios dotados cun total de 4.000 euros (1.500 euros para o primeiro, 1.100 para o segundo, 800 para o terceiro e 600 para o cuarto), mentres que no concurso de decoración veciñal repartíronse outros catro premios de 500 euros cada un.

O local da asociación Xuntanza de Empresarios de Ames (XEA) acolleu este pasado martes, 23 de xaneiro, o acto de entrega dos premios da quinta edición da campaña de promoción do comercio local “Ilumina o teu sorriso”. As premiadas foron Desireth Tirado Colina, de Eirapedriña, que recibiu un vale de 300 euros; Ana María Cortizo Rarís, do Milladoiro, que foi premiada cun vale de 100 euros; e Lizaida Carrillo Balsa, de Bertamiráns, que recibiu outro vale por valor de 100 euros. Os vales son para realizar compras nos establecementos comerciais adheridos a XEA. Nesta quinta edición houbo 42 participantes.

A Unión de Consumidores de Galicia vai impartir dúas charlas informativas sobre comisións e custos bancarios, e acceso e funcionamento da banca electrónica. A primeira charla terá lugar o 11 de decembro, ás 16:00 horas, no Centro de maiores de Bertamiráns; e a segunda será o xoves 14 de decembro, ás 19:00 horas, no Centro de maiores do Milladoiro. Esta actividade enmárcase no acordo que teñen asinado o Concello de Ames e a Unión de Consumidores de Galicia (UCGAL).