[11-10-2017] Será unha oportunidade para coñecer o río doutra maneira, observando diferentes formacións do bosque de ribeira e aprendendo a identificar a fauna de invertebrados que está presente nos regos, así como as especies indicadoras da calidade da auga. A actividade, que está organizada pola Concellaría de Medio Ambiente en colaboración coa Concellaría de Deportes, terá lugar o vindeiro sábado, 14 de outubro, entre as 10:30h e as 12:00 horas. Para participar é preciso anotarse previamente, entregando o formulario de inscrición - que se pode atopar no apartado de descargas desta nova - no Rexistro municipal ou enviándoo ao enderezo electrónico auladanatureza@concellodeames.gal.

[11-10-2017] Dirixida a todas as mulleres do Concello de Ames na procura de emprego ou cunha idea para emprender, a xornada informativa “Muller, decide o teu futuro laboral” celebrouse o martes, 10 de outubro, na Casa da Cultura do Milladoiro, e hoxe, día 11, no Pazo da Peregrina de Bertamiráns. Organizada pola Concellaría de Sanidade, Servizos Sociais e Igualdade, a través do Centro de Información á Muller (CIM) e en colaboración coa Concellaría de Promoción Económica, a xornada gozou dunha grande acollida. No total, asistiron preto de 50 mulleres.

[10-10-2017] O Obradoiro Alí, que está dirixido ao persoal das escolas infantís, públicas e privadas, e ao profesorado de infantil das EEI e dos CEIP do Concello de Ames, desenvolverase o vindeiro sábado, 21 de outubro. Será no Pazo da Peregrina, das 10:00h ás 14:00 horas. O obxectivo da súa realización é o de facer máis visible o material existente en galego para a primeira infancia, contribuíndo a que as crianzas poidan apropiarse do mundo na nosa lingua, ao tempo que aprenden dun xeito lúdico. O prazo de inscrición permanecerá aberto ata o 18 de outubro. As persoas interesadas poderán inscribirse enviando un correo ao Servizo de Normalización Lingüístico de Ames, normalizacion@concellodeames.gal, no que indiquen nome e apelidos, teléfono de contacto, escola na que traballan e o posto que ocupan.

[10-10-2017] Esta mañá o salón de plenos da Casa do Concello acolleu a presentación da décimo oitava edición da carreira pedestre popular Concello de Ames, que se desenvolverá pola contorna da localidade de Bertamiráns o vindeiro domingo, 22 de outubro, a partir das 10:30 horas. Contarase cun circuíto de 10 quilómetros homologado pola Real Federación Española de Atletismo. O percorrido irá dende os 200 metros ata os 10 quilómetros e haberá un total de 11 categorías. O prazo de inscrición xa está aberto e rematará o mércores 18 de outubro. Na actualidade hai 282 persoas inscritas. De xeito paralelo vaise organizar o sábado 21, pola mañá, un obradoiro no que se impartirán nocións de adestramento para atletas de carreiras populares.